لاہور: لاہور قلندرز اور یونیورسٹی آف مینجمنٹ اینڈ ٹیکنالوجی (یو ایم ٹی) نے پاکستان کے نوجوان کرکٹ ٹیلنٹ کو تعلیم، اعلیٰ کارکردگی کی تربیت، کوچنگ، اسکالرشپس اور اعلیٰ تعلیم کے مواقع فراہم کرنے کے لیے تین سالہ شراکت داری کا آغاز کر دیا۔
اس سلسلے میں مفاہمتی یادداشت پر لاہور قلندرز کے مالک اور چیف ایگزیکٹو آفیسر عاطف رانا اور یو ایم ٹی کے صدر ابراہیم مراد نے دستخط کیے۔ اس تعاون کا مقصد باصلاحیت نوجوان کھلاڑیوں کے لیے پیشہ ورانہ کرکٹ کی ترقی کو تعلیمی مواقع کے ساتھ منسلک کرنا ہے۔
معاہدے کے تحت لاہور قلندرز باصلاحیت کرکٹرز کی نشاندہی کرے گا اور انہیں یو ایم ٹی میں داخلے اور اسکالرشپ کے مواقع کے لیے سفارش کرے گا۔ اہل طلبہ کو یونیورسٹی کی پالیسیوں کے مطابق اسکالرشپس اور دیگر تعلیمی سہولتیں فراہم کی جائیں گی۔
دستخطی تقریب سے خطاب کرتے ہوئے عاطف رانا نے شراکت داری کا خیرمقدم کیا اور کہا کہ یہ تعاون نوجوان کرکٹرز کے لیے میدان کے اندر اور باہر آگے بڑھنے کے نئے راستے کھولے گا۔ ان کا کہنا تھا کہ ’’ہم اس بات کو یقینی بنائیں گے کہ نوجوان کھلاڑی نہ صرف تعلیم حاصل کریں بلکہ عملی مہارتوں سے بھی آراستہ ہوں۔‘‘ انہوں نے باصلاحیت کرکٹرز کے لیے اسکالرشپ مواقع کی حمایت پر ابراہیم مراد کا شکریہ بھی ادا کیا۔
لاہور قلندرز کے چیف ایگزیکٹو کے مطابق یہ شراکت داری ابھرتے ہوئے کھلاڑیوں کو تعلیم جاری رکھتے ہوئے اپنی کرکٹ صلاحیتیں نکھارنے کے لیے ایک مضبوط پلیٹ فارم فراہم کرے گی۔
یو ایم ٹی کے صدر ابراہیم مراد نے کہا کہ یونیورسٹی باصلاحیت ایتھلیٹس کی معاونت اور انہیں کھیل کے ساتھ کامیاب مستقبل بنانے کے مواقع دینے کے لیے پُرعزم ہے۔ ان کے مطابق ’’لاہور قلندرز اور یو ایم ٹی پاکستان کے لیے نئے چیمپئنز تیار کرنے کے لیے مل کر کام کریں گے۔‘‘ انہوں نے کہا کہ تعلیم یافتہ ایتھلیٹس بین الاقوامی سطح پر ملک کی نمائندگی میں اہم کردار ادا کر سکتے ہیں۔
اس شراکت داری میں مشترکہ ٹریننگ سیشنز، کوچنگ کلینکس، ٹیلنٹ ڈویلپمنٹ پروگرامز اور دوستانہ کرکٹ میچز بھی شامل ہوں گے۔ یو ایم ٹی کرکٹ ٹیم کے کھلاڑیوں کو لاہور قلندرز ہائی پرفارمنس سینٹر میں خصوصی تربیت حاصل کرنے کے مواقع ملیں گے، جہاں انہیں پیشہ ورانہ کرکٹ ڈویلپمنٹ کے ماحول تک رسائی حاصل ہو گی۔
دونوں ادارے منظم کرکٹ پروگرامز کے ذریعے ابھرتے ہوئے کھلاڑیوں کی نشاندہی اور تربیت کے لیے بھی مشترکہ کام کریں گے۔ تین سالہ مفاہمتی یادداشت ایک ایسے راستے کی تشکیل کی جانب وسیع کوشش ہے جس کے ذریعے باصلاحیت نوجوان کرکٹرز مسابقتی کرکٹ کو اعلیٰ تعلیم، پیشہ ورانہ تربیت اور مہارتوں کی ترقی کے ساتھ جاری رکھ سکیں۔
اس شراکت داری کے ذریعے لاہور قلندرز اور یو ایم ٹی نوجوان کھلاڑیوں کو اپنی کرکٹ صلاحیتوں کو بہتر بنانے کے ساتھ ساتھ کرکٹ کے میدان سے آگے کیریئر کے لیے تیار کرنے کے مواقع فراہم کرنا چاہتے ہیں۔
