اسلام آباد: ایشین گیمز 2026 میں پاکستان نے شاندار کارکردگی دکھاتے ہوئے عمان کو 7-2 سے شکست دے کر سیمی فائنل کے لیے کوالیفائی کر لیا۔ کوارٹر فائنل مقابلہ ناگویا کنجو فوتو ارینا میں کھیلا گیا جہاں گرین شرٹس نے ابتدا ہی سے جارحانہ انداز اپنایا۔
پاکستان نے پہلے ہاف کے اختتام تک 2-1 کی برتری حاصل کر رکھی تھی، جس کے بعد ٹیم نے دوسرے ہاف میں بھی دباؤ برقرار رکھا اور عمان کو واپسی کا موقع نہ دیا۔
پاکستان کی جانب سے رانا وحید نے ہیٹ ٹرک اسکور کی، جبکہ سفیان خان نے دو مرتبہ گیند کو جال میں پہنچایا۔ غضنفر علی اور محمد عماد نے ایک، ایک گول کیا۔
پول مرحلے میں پاکستان نے پول بی میں 12 پوائنٹس کے ساتھ دوسری پوزیشن حاصل کی تھی۔ ملائیشیا 15 پوائنٹس کے ساتھ گروپ میں سرفہرست رہا۔ پاکستان نے پانچ میں سے چار پول میچز جیتے، جبکہ اسے واحد شکست ملائیشیا کے خلاف ہوئی۔
گرین شرٹس نے پانچ میچز میں مجموعی طور پر 28 گول اسکور کیے اور آٹھ گول کھائے۔ سیمی فائنل میں پاکستان کا مقابلہ روایتی حریف بھارت سے یکم اکتوبر کو ہوگا۔
دوسری جانب پاکستان ایشین گیمز کے مردوں کے کرکٹ ایونٹ کے سیمی فائنل میں بھی پہنچ گیا۔ نِشِن، جاپان میں ہانگ کانگ، چائنا کے خلاف کوارٹر فائنل بارش کے باعث منسوخ ہوگیا۔ میچ نہ ہونے کے سبب بہتر رینکنگ کی بنیاد پر پاکستان نے سیمی فائنل میں جگہ بنالی، جبکہ ہانگ کانگ کی مہم اختتام کو پہنچ گئی۔
پاکستان نے اپنی رینکنگ کی بدولت بھارت، بنگلہ دیش اور سری لنکا کے ساتھ براہ راست ناک آؤٹ مرحلے میں جگہ بنائی تھی، جبکہ ہانگ کانگ نے گروپ بی میں دوسری پوزیشن حاصل کرکے کوارٹر فائنل تک رسائی حاصل کی تھی۔ چند گھنٹے بعد بارش کے باعث افغانستان کے خلاف کھیل ممکن نہ ہونے پر بھارت بھی آگے بڑھ گیا۔
