ویمن یونیورسٹی مردان میں فیکلٹی آف سائنسز اور فیکلٹی آف آرٹس اینڈ ہیومینیٹیز کے بورڈ کا پہلا اجلاس منعقد
مردان، 30 جون 2026: ویمن یونیورسٹی مردان میں وائس چانسلر پروفیسر ڈاکٹر راضیہ سلطانہ کی زیر صدارت فیکلٹی آف سائنسز اور فیکلٹی آف آرٹس اینڈ ہیومینیٹیز کے بورڈ کا پہلا اجلاس کامیابی سے منعقد ہوا۔
اجلاس میں دونوں فیکلٹیز کے بورڈ کے تمام اراکین، ڈائریکٹر اکیڈمکس مس حلیمہ اکرام اور ممتاز بیرونی ماہرین پروفیسر ڈاکٹر رسول جان اور پروفیسر ڈاکٹر منہاج الحسن نے شرکت کی۔ بیرونی ماہرین نے اپنے علمی تجربے اور سفارشات سے اجلاس کی کارروائی کو مزید مؤثر بنایا۔
اجلاس میں تعلیمی معیار کی بہتری، نصاب کی جدید خطوط پر تشکیل، ہائر ایجوکیشن کمیشن (HEC) کی پالیسیوں پر عملدرآمد اور دیگر قانونی و تعلیمی امور پر تفصیلی غور کیا گیا۔ فیکلٹی آف سائنسز اور فیکلٹی آف آرٹس اینڈ ہیومینیٹیز کے تمام شعبہ جات کے بورڈ آف اسٹڈیز کی سفارشات اور اجلاس کی کارروائی متفقہ طور پر منظور کرتے ہوئے انہیں مزید منظوری کے لیے اکیڈمک کونسل کو ارسال کرنے کا فیصلہ کیا گیا۔
بورڈ نے متعلقہ تعلیمی پروگراموں میں 3 کریڈٹ آورز پر مشتمل لازمی آرٹیفیشل انٹیلی جنس (AI) کورس متعارف کرانے، فہم القرآن I اور II کو اہل طلبہ کے لیے لازمی کریڈٹ کورسز کے طور پر شامل کرنے اور ہائر ایجوکیشن کمیشن کی نئی ہدایات کے مطابق پاکستان اسٹڈیز کے نظرثانی شدہ نصاب کو اپنانے کی منظوری بھی دی۔
اجلاس میں الائیڈ ہیلتھ سائنس اور آرٹ اینڈ ڈیزائن کے شعبہ جات کے تحت نئے تعلیمی پروگرامز کے قیام کی بھی منظوری دی گئی، جس کا مقصد خواتین کو جدید اور پیشہ ورانہ تقاضوں سے ہم آہنگ معیاری اعلیٰ تعلیم فراہم کرنا ہے۔
اس موقع پر وائس چانسلر پروفیسر ڈاکٹر راضیہ سلطانہ نے کہا کہ نصاب کی جدید کاری، تحقیق، جدت اور قومی معیارِ تعلیم کے تقاضوں پر سختی سے عملدرآمد کے ذریعے تعلیمی معیار کو مسلسل بہتر بنانا وقت کی اہم ضرورت ہے۔ انہوں نے فیکلٹی ممبران، ڈائریکٹر اکیڈمکس مس حلیمہ اکرام اور بیرونی ماہرین کی خدمات کو سراہتے ہوئے یونیورسٹی کی تعلیمی ترقی میں ان کے کردار کی تعریف کی۔
بیرونی ماہرین پروفیسر ڈاکٹر رسول جان اور پروفیسر ڈاکٹر منہاج الحسن نے ویمن یونیورسٹی مردان کی تعلیمی نظم و نسق، نصاب کی بہتری اور ہائر ایجوکیشن کمیشن کی اصلاحات پر مؤثر عملدرآمد کو سراہتے ہوئے کہا کہ یونیورسٹی معیاری اعلیٰ تعلیم کے فروغ کے لیے قابلِ تحسین اقدامات کر رہی ہے۔
اجلاس کے اختتام پر وائس چانسلر نے تمام شرکاء کا شکریہ ادا کیا۔ اجلاس کے کامیاب انعقاد نے ایک بار پھر اس عزم کا اظہار کیا کہ ویمن یونیورسٹی مردان معیاری تعلیم، تحقیق، جدت، معیارِ تعلیم کے فروغ اور خواتین کو بااختیار بنانے کے لیے اپنی کاوشیں جاری رکھے گی۔
