پشاور: خیبر پختونخوا میں روایتی کھیل کبڈی کے فروغ اور نچلی سطح کے کھلاڑیوں کو نمایاں کرنے کے لیے کے پی کبڈی ایسوسی ایشن کے نئے عہدیدار آئندہ مدت کے لیے بلا مقابلہ اور متفقہ طور پر منتخب کر لیے گئے۔
نئے عہدیداروں کا باضابطہ اعلان پشاور کے ایک مقامی ہوٹل میں منعقدہ جنرل باڈی اجلاس کے دوران کیا گیا، جس کی صدارت ایسوسی ایشن کے چیئرمین ارباب نصیر احمد خان نے کی۔ اجلاس میں پشاور، چارسدہ، مردان، صوابی، لکی مروت، ڈی آئی خان، بونیر اور لوئر دیر سمیت اہم اضلاع اور ڈویژنل ایسوسی ایشنز کے نمائندوں اور عہدیداروں نے بڑی تعداد میں شرکت کی۔
اجلاس میں پاکستان کبڈی فیڈریشن کے جنرل سیکرٹری رانا محمد سرور، کے پی اولمپک ایسوسی ایشن کے جنرل سیکرٹری ذوالفقار علی بٹ اور محکمہ کھیل خیبر پختونخوا کے اسسٹنٹ ڈائریکٹر اشفاق احمد بھی شریک ہوئے۔
جنرل باڈی کے ارکان سے تفصیلی مشاورت اور متفقہ منظوری کے بعد صوبائی کابینہ کی توثیق کی گئی۔ ارباب نصیر احمد خان چیئرمین، سلطان سید علی شاہ المعروف سلطان بڑے صدر، محمد فہیم سینئر نائب صدر، محمد ظاہر، انتخاب خان چمکنی، طاہر اور سید رسول شاہ نائب صدور منتخب ہوئے۔
حاجی عبدالغنی کو جنرل سیکرٹری، گل محمد خان کو ڈپٹی جنرل سیکرٹری، پرویز خان، کلیم اللہ اور سعید خان کو ایسوسی ایٹ سیکرٹریز مقرر کیا گیا۔ محب اللہ فنانس سیکرٹری ہوں گے جبکہ ایگزیکٹو باڈی کے ارکان میں تور خان، مسعود، افتخار، شیر اکایس، نعیم فاروق، اعجاز اور منیر خان شامل ہیں۔
نو منتخب کابینہ کو مبارک باد دیتے ہوئے پاکستان کبڈی فیڈریشن کے جنرل سیکرٹری رانا محمد سرور نے کہا کہ خیبر پختونخوا ہمیشہ کبڈی کا مضبوط مرکز رہا ہے اور صوبے میں بے پناہ ٹیلنٹ موجود ہے۔ انہوں نے یقین دہانی کرائی کہ پاکستان کبڈی فیڈریشن نچلی سطح کے نوجوان کھلاڑیوں کو قومی اور بین الاقوامی مقابلوں کے مواقع فراہم کرنے کے لیے نئی باڈی کی بھرپور معاونت کرے گی۔
کے پی اولمپک ایسوسی ایشن کے جنرل سیکرٹری ذوالفقار علی بٹ نے انتخابی عمل کو پرامن اور شفاف قرار دیتے ہوئے کہا کہ کھیل نوجوانوں کی مثبت سرگرمیوں کا اہم ذریعہ ہیں۔ انہوں نے نئی قیادت کے لیے اولمپک ایسوسی ایشن کی مکمل تکنیکی اور انتظامی معاونت کا بھی اعادہ کیا۔
محکمہ کھیل کے اسسٹنٹ ڈائریکٹر اشفاق احمد نے حکومتی تعاون کی یقین دہانی کراتے ہوئے کہا کہ تمام اضلاع میں کھیلوں کے انفراسٹرکچر کو فعال بنانا اولین ترجیح ہے۔ ان کے مطابق محکمہ کھیل صوبائی اور ضلعی سطح کے ٹورنامنٹس کے انعقاد کے لیے کبڈی ایسوسی ایشن کے ساتھ مل کر کام کرے گا۔
اجلاس کے اختتام پر نو منتخب صدر سلطان سید علی شاہ اور جنرل سیکرٹری حاجی عبدالغنی نے ارکان اور مہمانوں کا شکریہ ادا کیا۔ انہوں نے صوبے میں کبڈی کی روایات کو بحال کرنے، دور دراز علاقوں سے نیا ٹیلنٹ سامنے لانے اور جلد ٹریننگ کیمپس و ٹورنامنٹس کے شیڈول کے اعلان کے عزم کا اظہار کیا۔
