اسلام آباد: پاکستان نے جاری ون ڈے ٹرائی سیریز کے لیے اپنے اسکواڈ میں تبدیلی کرتے ہوئے لیفٹ آرم رسٹ اسپنر سفیان مقیم کو ریلیز کر دیا ہے، جبکہ نوجوان بائیں ہاتھ کے بیٹر ماز صداقت کو کور کے طور پر اسکواڈ میں شامل کیا گیا ہے۔
پاکستان کرکٹ بورڈ (پی سی بی) کے مطابق سفیان مقیم کو لاہور کی پچز کی نوعیت کو مدنظر رکھتے ہوئے پاکستان مینز اسکواڈ سے ریلیز کیا گیا ہے۔ پی سی بی نے اپنے بیان میں کہا کہ سفیان مقیم اب ڈومیسٹک کرکٹ کھیلنے کے لیے واپس جائیں گے۔
پی سی بی کے بیان کے مطابق، “لیفٹ آرم رسٹ اسپنر سفیان مقیم کو لاہور کی پچز کی نوعیت کو دیکھتے ہوئے پاکستان مینز اسکواڈ سے ریلیز کیا گیا ہے۔” بیان میں مزید کہا گیا کہ “وہ ڈومیسٹک کرکٹ کھیلنے کے لیے واپس جائیں گے۔”
چوبیس سالہ سفیان مقیم پاکستان کی جانب سے چار ون ڈے میچز میں آٹھ وکٹیں حاصل کر چکے ہیں۔ انہوں نے 22 ٹی ٹوئنٹی انٹرنیشنل میچز میں 30 وکٹیں بھی لی ہیں۔
دوسری جانب ماز صداقت کو ان کھلاڑیوں کے کور کے طور پر اسکواڈ میں شامل کیا گیا ہے جو معمولی نوعیت کی فٹنس مسائل سے دوچار ہیں۔ ضرورت پڑنے پر انہیں پلیئنگ الیون میں بھی شامل کیا جا سکتا ہے۔
پی سی بی نے کہا کہ “بائیں ہاتھ کے بیٹر ماز صداقت کو معمولی نگلز کا سامنا کرنے والے کھلاڑیوں کے کور کے طور پر اسکواڈ میں شامل کیا گیا ہے۔”
ماز صداقت پاکستان کے لیے چھ ون ڈے میچز کھیل چکے ہیں، جن میں انہوں نے 134 رنز بنائے ہیں اور ایک نصف سنچری بھی اس میں شامل ہے۔ وہ پانچ ٹی ٹوئنٹی انٹرنیشنل میچز میں بھی پاکستان کی نمائندگی کر چکے ہیں، جہاں انہوں نے 170.37 کے اسٹرائیک ریٹ سے 184 رنز بنائے۔
پاکستان کا اسکواڈ: شاہین شاہ آفریدی (کپتان)، ابرار احمد، سلمان علی آغا، عرفات منہاس، بابر اعظم، فہیم اشرف، فخر زمان، محمد غازی غوری (وکٹ کیپر)، حارث رؤف، حسن نواز، نسیم شاہ، رضاع اللہ، سعد بیگ (وکٹ کیپر)، صائم ایوب، شاداب خان اور ماز صداقت۔
