اسلام آباد: جاپان کے شہر ناگویا میں 20ویں ایشین گیمز کا ہفتہ کو رقص، موسیقی اور آتش بازی سے بھرپور افتتاحی تقریب کے ساتھ آغاز ہوگیا، تاہم اس بڑے کھیل میلے سے پہلے انتظامی غلطیوں اور لاجسٹک مسائل نے تیاریوں پر سوالات اٹھائے تھے۔
ٹوکیو اولمپکس کے پانچ سال بعد، جو کووڈ 19 پابندیوں کے باعث خالی میدانوں میں منعقد ہوئے تھے، جاپان نے میزُوہو پارک ایتھلیٹک اسٹیڈیم میں شائقین کا خیرمقدم کیا۔ افتتاحی تقریب کا آغاز نسبتاً سادہ انداز میں ہوا، لیکن بعد میں یہ رنگوں اور آوازوں کے شاندار مظاہرے میں بدل گئی۔
جاپان کے شہنشاہ ناروہیٹو نے 45 ممالک اور خطوں کے دستوں کی پریڈ دیکھنے کے بعد گیمز کے باضابطہ آغاز کا اعلان کیا۔ وہ معزز مہمانوں کی نشست پر انٹرنیشنل اولمپک کمیٹی کی سربراہ کرسٹی کوونٹری کے ساتھ موجود تھے۔ شہنشاہ ناروہیٹو کی شاہی خاندان کے ارکان کے ہمراہ آمد کے موقع پر سخت سکیورٹی انتظامات کیے گئے۔ منتظمین کے مطابق افتتاحی تقریب کے لیے 10 ہزار تک پولیس اہلکار تعینات کیے جانا تھے۔
اولمپک کونسل آف ایشیا کے صدر شیخ جوعان بن حمد الثانی نے اپنے خطاب میں کہا کہ ایک ایسے وقت میں جب دنیا اکثر تنازعات کے باعث تقسیم دکھائی دیتی ہے، ایشیاڈ کے کھلاڑی یاد دلاتے ہیں کہ کھیل امن، سمجھ بوجھ اور اقوام کے درمیان دوستی کے لیے ایک مضبوط قوت ہے۔
مشعل برداری کے اختتام پر جاپان کے باپ بیٹے شگینوبو موروفوشی اور کوجی موروفوشی نے سیڑھیاں چڑھ کر مشترکہ طور پر cauldron روشن کیا۔ دونوں ہتھوڑا پھینکنے کے مقابلوں میں سابق ایشین گیمز چیمپئن رہ چکے ہیں۔
منتظمین کو امید ہوگی کہ افتتاحی تقریب، کھیلوں کے آغاز سے پہلے پیدا ہونے والے تنازعات اور شکایات کو پیچھے چھوڑنے میں مدد دے گی۔ ایتھلیٹس اور آفیشلز کی جانب سے رہائش اور ٹرانسپورٹ کے حوالے سے شکایات سامنے آئی تھیں، جس کے باعث جاپان کی درستگی اور مؤثر انتظامات کی شہرت بھی زیر بحث آئی۔
جاپان 11 ہزار سے زائد ایتھلیٹس کی میزبانی کر رہا ہے جو 43 کھیلوں کے بڑے پروگرام میں 369 طلائی تمغوں کے لیے مقابلہ کریں گے۔ اخراجات کم رکھنے کے لیے منتظمین نے ایک مخصوص گیمز ولیج تعمیر کرنے کے بجائے کھلاڑیوں اور حکام کو ہوٹل کمروں، عارضی لکڑی کے کنٹینرز اور خلیج میں لنگر انداز ایک کروز شپ میں ٹھہرایا ہے۔
میزبان جاپان سمیت کئی قومی دستوں نے ان انتظامات کو غیر تسلی بخش قرار دیا۔ شکایات میں کمروں کی گڑبڑ اور ڈبل بکنگ شامل رہی، جبکہ جنوبی کوریا نے کہا کہ گارڈن پیئر پر موجود کنٹینرز ان کے باسکٹ بال کھلاڑیوں کے لیے بہت تنگ ہیں۔
بھارت کے طاقتور کرکٹ بورڈ نے منتظمین کی جانب سے بستروں کی محدود فراہمی کے باعث اپنے مردوں کی اسٹار کھلاڑیوں پر مشتمل کرکٹ ٹیم کے لیے الگ ہوٹل کا انتظام خود کیا۔
کئی وفود نے آمد پر ایتھلیٹس کی رجسٹریشن میں طویل انتظار کی بھی شکایت کی۔ بسوں کے دیر سے پہنچنے یا کھلاڑیوں کو غلط مقامات پر لے جانے کے واقعات بھی رپورٹ ہوئے۔ چار سال بعد ہونے والے ان گیمز کا انتظام چلانے والی اولمپک کونسل آف ایشیا نے ہفتہ کو مسائل کا اعتراف کیا، تاہم انہیں ابتدائی نوعیت کی مشکلات قرار دیا۔
یوکی ہیکو تسوتسومی کی ہدایت کاری میں ہونے والی افتتاحی تقریب کا آغاز کلاسیکی موسیقی اور دل کی شکل کے اسٹیج پر رقص سے ہوا، جس کے بعد ممالک کی پریڈ ہوئی۔ اس پریڈ میں نسبتاً الگ تھلگ سمجھے جانے والے شمالی کوریا کا دستہ بھی شریک تھا۔
بعد ازاں تقریب میں جوش بڑھتا گیا۔ بوائلر سوٹ پہنے رقاصوں نے ناگویا کی صنعتی اور مینوفیکچرنگ روایت کو اجاگر کیا، جبکہ رات کا اختتام آتش بازی کے مظاہرے سے ہوا۔ تقریب کا موضوع “Harmonic Heart Beat” رکھا گیا تھا، جس کا مقصد ایشیائی یکجہتی کا پیغام دینا تھا، ایسے ایونٹ میں جہاں جغرافیائی سیاسی کشیدگی اور تاریخی رنجشیں اکثر نمایاں رہتی ہیں۔
تاہم پرامن گیمز کی امیدوں کو چند واقعات سے پہلے ہی دھچکا لگا ہے۔ تائیوان کے وفد نے جمعہ کو اپنی ویلکم تقریب میں عارضی طور پر شرکت سے انکار کیا تھا، کیونکہ کھیلوں کے وزیر اور سابق اولمپک چیمپئن لی یانگ کو اس تقریب میں آنے سے روک دیا گیا تھا۔
جنوبی کوریا کی مردوں کی ہاکی ٹیم بھی اس وقت ناراض ہوئی جب ایک میچ سے قبل اسٹیڈیم میں جنوبی کوریا کے بجائے شمالی کوریا کا قومی ترانہ بجا دیا گیا۔
اگرچہ باسکٹ بال، فٹ بال اور دیگر کھیلوں کے مقابلے پہلے ہی شروع ہوچکے ہیں، لیکن پہلا طلائی تمغہ اتوار کو دیے جانے کا امکان ہے، غالباً ٹرائتھلون میں۔
اتوار ہی سے ٹوکیو میں اعلیٰ معیار کے تیراکی مقابلوں کا آغاز ہوگا، جن میں چین کے 100 میٹر فری اسٹائل ورلڈ ریکارڈ ہولڈر پان ژانلے اور 13 سالہ ابھرتی ہوئی تیراک یو زیدی بھی شامل ہیں۔
روایتی اولمپک کھیلوں کے علاوہ ایشین گیمز میں خطے کے مقبول کھیل کبڈی اور سیپاک ٹاکرا بھی شامل ہوں گے۔ جدید اور منفرد نوعیت کے ایونٹس بھی پروگرام کا حصہ ہیں۔ ہانگژو میں ڈیبیو کے بعد ای اسپورٹس ایک بار پھر میڈلز دے گا، جبکہ ٹیبل ٹینس اور فٹ بال کے امتزاج teqball اور “virtual taekwondo” پہلی بار ایشین گیمز میں شامل ہوں گے۔
