5 اکتوبر 2026ء کو جاری پریس ریلیز کے مطابق پاکستان کے ٹیکنالوجی شعبے نے ایک اہم عالمی کامیابی حاصل کر لی ہے۔ پاکستان سافٹ ویئر ہاؤسز ایسوسی ایشن (P@SHA) کے سابق چیئرمین اور آئی ٹی انڈسٹری کے معروف رہنما محمد زوہیب خان ایشین اوشینین کمپیوٹنگ انڈسٹری آرگنائزیشن (ASOCIO) کے وائس چیئرمین منتخب ہو گئے ہیں۔
یہ انتخاب پاکستان کے لیے اس لیے بھی تاریخی قرار دیا جا رہا ہے کہ زوہیب خان ASOCIO میں وائس چیئرمین اور بورڈ ممبر کا منصب حاصل کرنے والے پہلے پاکستانی ہیں۔ تنظیم کے ساتھ پاکستان کی 25 سال سے زائد وابستگی کے دوران یہ پہلا موقع ہے کہ کسی پاکستانی کو اس سطح کی نمائندگی ملی ہے۔
پرائیڈ آف پاکستان ایوارڈ حاصل کرنے والے محمد زوہیب خان کا انتخاب پاکستان کے ڈیجیٹل ایکو سسٹم کی بڑھتی ہوئی اہمیت، جدت اور عالمی سطح پر مسابقتی صلاحیت کی عکاسی کرتا ہے۔ ASOCIO ایشیا اور اوشیانا کے تقریباً 26 ممالک اور معیشتوں کی قومی ٹیکنالوجی ایسوسی ایشنز کو ایک پلیٹ فارم پر لانے والی نمایاں علاقائی آئی سی ٹی فیڈریشن ہے۔
یہ تنظیم سرحد پار تعاون، ڈیجیٹل پالیسی پر مکالمے اور آئی ٹی صنعت کی ترقی کے لیے قائم کی گئی ہے اور ایشیا پیسفک خطے کی ٹیک مارکیٹس کے درمیان ایک اہم رابطہ پل کا کردار ادا کرتی ہے۔
اپنی تقرری پر محمد زوہیب خان نے کہا کہ یہ پاکستان اور اس کی آئی ٹی انڈسٹری کے لیے باعث فخر لمحہ ہے۔ ان کے مطابق ASOCIO ایشیا پیسفک کی 26 معیشتوں کو اکٹھا کرتا ہے اور علاقائی ٹیکنالوجی تعاون کے لیے ایک اہم فورم فراہم کرتا ہے۔
زوہیب خان نے کہا کہ ان کی توجہ اس ایکو سسٹم میں پاکستان کی موجودگی کو مزید مضبوط بنانے، بین الاقوامی شراکت داریوں کو فروغ دینے اور عالمی منڈیوں میں پاکستانی آئی ٹی کمپنیوں اور پروفیشنلز کے لیے زیادہ مواقع پیدا کرنے پر مرکوز رہے گی۔
محمد زوہیب خان پاکستان کے ٹیک منظرنامے میں ایک فعال اور نمایاں کردار ادا کرتے رہے ہیں۔ وہ اس سے قبل P@SHA کی قیادت کر چکے ہیں، جس کے دوران ادارے نے اہم ترقی کا سفر طے کیا۔ توقع ظاہر کی جا رہی ہے کہ ان کی نئی ذمہ داری پاکستان کی سافٹ ویئر برآمدات میں اضافے، بین الاقوامی مشترکہ منصوبوں کے فروغ اور ملک کو ایک ابھرتے ہوئے علاقائی ٹیک ہب کے طور پر اجاگر کرنے میں مدد دے گی۔
