بین الاقوامی سطح پر فیلڈ مارشل سید عاصم منیر کی قائدانہ صلاحیتوں اور مؤثر ملٹری ڈپلومیسی کو غیر معمولی پذیرائی حاصل ہو رہی ہے۔ وائس چانسلر پروفیسر ڈاکٹر قمرالزمان
پیر مہر علی شاہ بارانی زرعی یونیورسٹی راولپنڈی میں وائس چانسلر پروفیسر ڈاکٹر قمرالزمان کی قیادت میں معرکۂ حق اور آپریشن بنیانٌ مرصوص کی کامیابیوں اور قربانیوں کو خراجِ تحسین پیش کرنے کے لیے ایک یادگاری واک کا انعقاد کیا گیا۔ واک میں یونیورسٹی کے اساتذہ، انتظامی افسران، طلبہ اور ملازمین نے بھرپور شرکت کی اور افواجِ پاکستان سے اظہارِ یکجہتی کرتے ہوئے اُن شہداء اور قومی ہیروز کو خراجِ عقیدت پیش کیا جنہوں نے وطنِ عزیز کے دفاع، سلامتی اور خودمختاری کے لیے بے مثال قربانیاں دیں۔
اس موقع پر خطاب کرتے ہوئے وائس چانسلر پروفیسر ڈاکٹر قمرالزمان نے کہا کہ افواجِ پاکستان نے ہمیشہ اندرونی و بیرونی خطرات کے خلاف ملک کے دفاع میں غیر معمولی جرات، پیشہ وارانہ مہارت اور بے مثال عزم کا مظاہرہ کیا ہے۔ انہوں نے کہا کہ پوری پاکستانی قوم اپنی افواجِ پاکستان کے ساتھ شانہ بشانہ کھڑی ہے اور ملکی سلامتی، امن اور استحکام کے لیے ان پر فخر کرتی ہے۔
وائس چانسلر صاحب نے چیف آف آرمی اسٹاف و چیف آف ڈیفنس فورسز فیلڈ مارشل سید عاصم منیر، نشانِ امتیاز (ملٹری)، ہلالِ جرات کو معرکۂ حق کے دوران اُن کی مدبرانہ قیادت، غیر معمولی پیشہ وارانہ صلاحیتوں اور پاکستان کے دفاع کے لیے غیر متزلزل عزم پر خراجِ تحسین پیش کیا۔ انہوں نے کہا کہ فیلڈ مارشل سید عاصم منیر کی جرات مندانہ اور حکمتِ عملی پر مبنی قیادت میں قوم نے اتحاد، استقامت اور بے مثال عزم کا مظاہرہ کیا، جس نے افواجِ پاکستان کے حوصلے بلند کیے اور ہر پاکستانی کو فخر اور اعتماد کا نیا جذبہ عطا کیا۔ انہوں نے مزید کہا کہ بین الاقوامی سطح پر فیلڈ مارشل سید عاصم منیر کی قائدانہ صلاحیتوں اور مؤثر ملٹری ڈپلومیسی کو غیر معمولی پذیرائی حاصل ہو رہی ہے۔
پروفیسر ڈاکٹر قمرالزمان نے نوجوانوں میں حب الوطنی، قومی یکجہتی اور شعور اجاگر کرنے کی اہمیت پر بھی زور دیا۔ انہوں نے کہا کہ تعلیمی ادارے ذمہ دار شہریوں کی تربیت میں کلیدی کردار ادا کرتے ہیں جو قومی سلامتی، یکجہتی اور ترقی کی اقدار کو فروغ دیتے ہوئے پاکستان کی خوشحالی اور استحکام میں مثبت کردار ادا کرتے ہیں۔
اس موقع پر پرچم کشائی کی تقریب بھی منعقد کی گئی جبکہ پاکستان کے امن، ترقی، خوشحالی اور سلامتی کے لیے خصوصی دعائیں بھی کی گئیں۔ وطن کے دفاع میں جانوں کا نذرانہ پیش کرنے والے شہداء کے ایصالِ ثواب اور درجات کی بلندی کے لیے بھی خصوصی دعا کی گئی۔
