اسلام آباد: ملائیشیا کے سفارت خانے کے ڈپٹی ہیڈ آف مشن محمد شفیق فردوس حسب اللہ نے پارلیمنٹ ہاؤس میں چیئرمین سینیٹ پاکستان سید یوسف رضا گیلانی کی مشیر اور آئی ایس سی کے لیے سفیر مصباح کھر سے ملاقات کی۔ ملاقات میں پاکستان اور ملائیشیا کے دیرینہ دوستانہ تعلقات کو مزید مستحکم بنانے، پارلیمانی روابط، ادارہ جاتی تعلقات اور باہمی دلچسپی کے شعبوں میں تعاون بڑھانے پر تبادلہ خیال کیا گیا۔
مصباح کھر نے معزز مہمان کا خیرمقدم کرتے ہوئے کہا کہ پاکستان اور ملائیشیا کے درمیان گرمجوش اور برادرانہ تعلقات مشترکہ اقدار، باہمی احترام اور طویل عرصے سے جاری تعاون پر مبنی ہیں۔ انہوں نے کہا کہ دونوں ممالک علاقائی اور بین الاقوامی فورمز پر ایک دوسرے کی مسلسل حمایت کرتے آئے ہیں اور مختلف شعبوں میں قریبی تعاون سے مستفید ہو رہے ہیں۔
مصباح کھر نے دوطرفہ تعلقات کو گہرا کرنے اور دونوں قوموں کے درمیان بہتر فہم و ہم آہنگی کے فروغ کے لیے پارلیمانی سفارت کاری کی اہمیت پر زور دیا۔ ان کا کہنا تھا کہ چیئرمین سینیٹ سید یوسف رضا گیلانی کی قیادت میں سینیٹ آف پاکستان دوست ممالک کے ساتھ مسلسل پارلیمانی تبادلوں اور مضبوط ادارہ جاتی تعاون کے ذریعے روابط کو فروغ دینے کے لیے پرعزم ہے۔
ملاقات کے دوران دونوں جانب سے پارلیمانی اداروں کے درمیان تعاون کو وسعت دینے، پارلیمانی کمیٹیوں، تھنک ٹینکس، تعلیمی اداروں اور نوجوانوں کی تنظیموں کے درمیان روابط بڑھانے، صلاحیت سازی کے اقدامات اور بہترین تجربات کے تبادلے کو فروغ دینے پر بھی گفتگو ہوئی۔ تجارت، سرمایہ کاری، سیاحت، تعلیم، ڈیجیٹل معیشت، خواتین کو بااختیار بنانے اور نوجوانوں کی ترقی کے شعبوں میں تعاون کے امکانات بھی زیر بحث آئے۔
مصباح کھر نے کہا کہ پاکستان ملائیشیا کے ساتھ اپنے تعلقات کو بڑی اہمیت دیتا ہے اور دونوں ممالک کے باہمی مفاد کے لیے اعلیٰ سطحی تبادلوں، عوامی روابط اور ادارہ جاتی شراکت داری کو مزید مضبوط بنانے کا خواہاں ہے۔
ملائیشیا کے ڈپٹی ہیڈ آف مشن محمد شفیق فردوس حسب اللہ نے گرمجوش استقبال پر مصباح کھر کا شکریہ ادا کیا اور پاکستان کے ساتھ دوستی اور تعاون کو مزید گہرا کرنے کے لیے ملائیشیا کے عزم کا اعادہ کیا۔ انہوں نے اعتماد ظاہر کیا کہ مضبوط پارلیمانی روابط اور قریبی ادارہ جاتی تعلقات اقتصادی، تعلیمی، ثقافتی اور سیاحتی شعبوں میں دوطرفہ تعاون کے فروغ میں نمایاں کردار ادا کریں گے۔
ملاقات کے اختتام پر دونوں جانب سے پاکستان ملائیشیا تعلقات کے فروغ، پارلیمانی سفارت کاری کو مضبوط بنانے اور ادارہ جاتی تعاون کی نئی راہیں تلاش کرنے کے مشترکہ عزم کا اعادہ کیا گیا تاکہ دونوں دوست ممالک کے درمیان پائیدار شراکت داری مزید مستحکم ہو سکے۔
