آئی بی سی سی کے زیر اہتمام آل پاکستان انٹر بورڈز ہاکی چیمپئن شپ 2025–26 کا کامیاب انعقاد — تعلیمی اداروں میں اسپورٹس کلچر کے فروغ کا عزم
اسلام آباد، 24 اپریل 2026 — انٹر بورڈز کوآرڈینیشن کمیشن (آئی بی سی سی) نے اپنی ذیلی کمیٹی انٹر بورڈ اسپورٹس کمیٹی (IBSC) کے ذریعے آل پاکستان انٹر بورڈز ہاکی چیمپئن شپ 2025–26 کا کامیاب انعقاد کیا، جس کی میزبانی لاہور بورڈ نے 21 سے 23 اپریل 2026 تک کی۔
چیمپئن شپ میں ملک بھر کے 12 تعلیمی بورڈز نے بھرپور شرکت کی، جن میں لاہور، گوجرانوالہ، سرگودھا، فیصل آباد، ساہیوال، راولپنڈی، بہاولپور، ملتان، پنجاب بورڈ آف ٹیکنیکل ایجوکیشن، بنوں، مردان اور پشاور شامل تھے، جس سے قومی سطح پر کھیلوں کے فروغ اور یکجہتی کا مظاہرہ ہوا۔
مقابلوں کے اختتام پر لاہور بورڈ نے پہلی، گوجرانوالہ نے دوسری جبکہ پشاور نے تیسری پوزیشن حاصل کی۔
اختتامی تقریب کے مہمانِ خصوصی ایگزیکٹو ڈائریکٹر آئی بی سی سی ڈاکٹر غلام علی ملاح تھے، جن کے ہمراہ اولمپین شہباز سینئر، جناب پرویز سندیلا، جناب خواجہ جنید، جناب فیصل فرید، جناب رضوان نذیر اور جناب مسعود الرحمان سمیت دیگر معزز شخصیات موجود تھیں۔
اپنے خطاب میں ڈاکٹر غلام علی ملاح نے کہا کہ آئی بی سی سی نہ صرف تعلیمی ہم آہنگی کا قومی ادارہ ہے بلکہ طلبہ کی ہمہ جہت نشوونما کے لیے ہم نصابی سرگرمیوں کے فروغ کو بھی اپنی بنیادی ذمہ داری سمجھتا ہے۔ انہوں نے بتایا کہ آئی بی سی سی، انٹر بورڈ اسپورٹس کمیٹی کے ذریعے ہر سال 30 سے زائد قومی و بین الاقوامی سطح کے اسپورٹس مقابلے کا انعقاد کرتا ہے، جن میں لڑکے اور لڑکیاں برابر حصہ لیتے ہیں۔
انہوں نے مزید کہا کہ قومی کھیل ہاکی کا فروغ آئی بی سی سی کی ترجیحات میں سرفہرست ہے، خصوصاً پاکستان ہاکی فیڈریشن میں ان کی شمولیت کے بعد اس سلسلے میں کوششیں مزید تیز کر دی گئی ہیں۔ ان کا کہنا تھا کہ تعلیمی اداروں میں اسپورٹس کلچر کو فروغ دے کر ہم طلبہ میں نظم و ضبط، ٹیم ورک، قیادت اور جسمانی و ذہنی صحت کو بہتر بنا سکتے ہیں۔
ڈاکٹر ملاح نے لاہور بورڈ کی جانب سے شاندار انتظامات اور پیشہ ورانہ انداز میں مقابلے کے انعقاد کو سراہا۔ انہوں نے آرگنائزنگ سیکریٹری ڈاکٹر بدر محی الدین کی خدمات کو بھی خراج تحسین پیش کیا جن کی محنت اور مؤثر قیادت نے ایونٹ کو کامیاب بنایا۔
تقریب کے اختتام پر اس عزم کا اعادہ کیا گیا کہ آئی بی سی سی ملک بھر کے تعلیمی اداروں میں کھیلوں اور دیگر ہم نصابی سرگرمیوں کو مزید فروغ دے گا تاکہ ایک صحت مند، متحرک اور باصلاحیت نوجوان نسل تیار کی جا سکے۔
