راولپنڈی: گیارہویں قومی انڈور مین اینڈ ویمن روئنگ چیمپئن شپ میں ہائر ایجوکیشن کمیشن (ایچ ای سی) کی ٹیم نے مجموعی طور پر چار تمغے اپنے نام کر لیے، جن میں دو چاندی اور دو کانسی کے تمغے شامل ہیں۔
چیمپئن شپ میں ایچ ای سی ٹیم کی مینجمنٹ کی ذمہ داری راولپنڈی ویمن یونیورسٹی کو دی گئی تھی، جبکہ یونیورسٹی کی وائس چانسلر پروفیسر ڈاکٹر طیبہ ظریف نے تقریب میں بطور مہمانِ خصوصی شرکت کی۔ یہ چیمپئن شپ پاکستان روئنگ فیڈریشن اور ڈائریکٹوریٹ آف اسپورٹس، پاکستان آرمی کے اشتراک سے منعقد کی گئی۔
مقابلوں میں ایچ ای سی کی ٹیم نے لائٹ ویٹ ویمنز پیئر اور اوپن مکسڈ پیئر کے 2000 میٹر مقابلوں میں چاندی کے تمغے حاصل کیے۔ اسی طرح لائٹ ویٹ مینز پیئر اور لائٹ ویٹ مکسڈ پیئر کے 2000 میٹر مقابلوں میں ایچ ای سی نے کانسی کے تمغے جیتے۔
اس موقع پر وائس چانسلر پروفیسر ڈاکٹر طیبہ ظریف نے کھلاڑیوں کی کارکردگی کو سراہا اور کہا کہ کھیل نوجوانوں کی شخصیت سازی اور ہمہ جہت ترقی میں نہایت اہم کردار ادا کرتے ہیں۔ ان کے مطابق کھیلوں میں حصہ لینے سے نوجوانوں میں نظم و ضبط، ٹیم ورک، قیادت، عزم اور مثبت مسابقت کا جذبہ پیدا ہوتا ہے، جو عملی زندگی میں بھی بہتر کارکردگی کے لیے مددگار ثابت ہوتا ہے۔
پروفیسر ڈاکٹر طیبہ ظریف نے کہا کہ کھیلوں کے میدان میں کامیابی صرف انفرادی صلاحیت کا نتیجہ نہیں ہوتی بلکہ اس کے لیے اجتماعی کوشش، باہمی تعاون اور مؤثر حکمت عملی بھی ضروری ہوتی ہے۔ انہوں نے اس بات پر زور دیا کہ نوجوان کھلاڑیوں کو اپنی صلاحیتیں منوانے اور قومی سطح پر آگے بڑھنے کے مواقع فراہم کیے جانے چاہییں۔
وائس چانسلر نے کھیلوں کے فروغ کے لیے متعلقہ اداروں کی کوششوں کو بھی قابلِ تحسین قرار دیا۔ انہوں نے کہا کہ راولپنڈی ویمن یونیورسٹی نوجوان کھلاڑیوں کی حوصلہ افزائی کے لیے آئندہ بھی ہر ممکن سہولت اور معاونت فراہم کرتی رہے گی۔
ایچ ای سی ٹیم مینجمنٹ کی ذمہ داری راولپنڈی ویمن یونیورسٹی کو سونپا جانا قومی سطح پر کھیلوں کے فروغ میں یونیورسٹی کے بڑھتے ہوئے کردار کی عکاسی کرتا ہے۔ پروفیسر ڈاکٹر طیبہ ظریف کی خصوصی توجہ اور سرپرستی میں یونیورسٹی نے اس ذمہ داری کو مؤثر انداز میں نبھانے کے لیے انتظامی و تنظیمی معاونت فراہم کی۔
