نوید ستی
اسلام آباد: ہائر ایجوکیشن کمیشن میں ایجوکیشن ٹیسٹنگ کونسل کے چیف ایگزیکٹو آفیسر کی تعیناتی کے عمل پر سوالات اٹھائے گئے ہیں، خاص طور پر شارٹ لسٹنگ اور انٹرویو کے طریقہ کار کے حوالے سے۔
دستیاب معلومات و ذرائع کے مطابق ڈاکٹر محمد امتیاز حیدر نے ہائر ایجوکیشن کمیشن میں دو عہدوں، مینیجر آپریشنز اور ایجوکیشن ٹیسٹنگ کونسل کے چیف ایگزیکٹو آفیسر کے لیے درخواست دی تھی۔
دونوں عہدوں کے لیے امیدواروں کی جانچ پڑتال الگ الگ کی گئی۔ دستیاب تفصیلات کے مطابق ڈاکٹر حیدر کو مینیجر آپریشنز کے عہدے کے لیے شارٹ لسٹ کیا گیا، تاہم ایجوکیشن ٹیسٹنگ کونسل کے چیف ایگزیکٹو آفیسر کے عہدے کے لیے ابتدائی انٹرویو لسٹ میں ان کی درخواست شامل نہیں تھی۔
مزید بتایا گیا ہے کہ مینیجر آپریشنز کے لیے انٹرویو کے دوران ڈاکٹر حیدر نے ایجوکیشن ٹیسٹنگ کونسل کے انٹرویو کے لیے اپنی عدم شمولیت کا معاملہ اٹھایا۔ اس کے بعد انہیں اگلے روز ہونے والے ایجوکیشن ٹیسٹنگ کونسل کے انٹرویو میں شرکت کی اجازت دے دی گئی۔
اس پیش رفت کے بعد سوال یہ سامنے آیا ہے کہ انٹرویو لسٹ میں تبدیلی کس بنیاد پر کی گئی اور ابتدائی طور پر شارٹ لسٹ نہ ہونے والے امیدوار کو بعد میں انٹرویو کے عمل میں شامل کرنے کے لیے کیا طریقہ کار اختیار کیا گیا۔
معاملے نے اس لیے بھی توجہ حاصل کی ہے کہ ایجوکیشن ٹیسٹنگ کونسل کے عہدے کے امیدواروں میں سینئر تعلیمی اور سرکاری عہدیدار بھی شامل تھے، جن میں وائس چانسلرز اور ہائر ایجوکیشن کمیشن کے سینئر افسران شامل تھے۔
بعد ازاں ہائر ایجوکیشن کمیشن نے نوٹیفکیشن نمبر 5(713)/HRM Personal/2026/HEC/5669 جاری کیا، جس کے مطابق ڈاکٹر محمد امتیاز حیدر نے 24 اگست 2026 کو تین سالہ معاہدے کے تحت ایجوکیشن ٹیسٹنگ کونسل کے چیف ایگزیکٹو آفیسر کا عہدہ سنبھال لیا۔
اس معاملے پر بھرتی کے ریکارڈ کا جائزہ لینے کی بات بھی سامنے آئی ہے تاکہ شارٹ لسٹنگ، انٹرویو اور تعیناتی کے پورے عمل کی وضاحت سامنے آسکے۔
رابطہ کرنے پر ڈاکٹر امتیاز حیدر نے کہا کہ شارٹ لسٹنگ اور انٹرویو کے حوالے سے فیصلے کرنے کا اختیار چیئرمین ہائر ایجوکیشن کمیشن کے پاس ہے۔ ہائر ایجوکیشن کمیشن کے چیئرمین ڈاکٹر نیاز سے مؤقف جاننے کی کوشش کی گئی تاہم ان کی جانب سے کوئی جواب موصول نہیں ہوا۔
شارٹ لسٹنگ میں تبدیلی کی بنیاد اور امیدوار کو بعد میں انٹرویو میں شامل کرنے کے طریقہ کار سے متعلق حتمی وضاحت متعلقہ سرکاری ریکارڈ اور ہائر ایجوکیشن کمیشن کے مروجہ بھرتی کے طریقہ کار کے جائزے سے سامنے آسکتی ہے۔
