ساؤتھمپٹن میں کھیلے گئے پہلے ٹی ٹوئنٹی انٹرنیشنل میں انگلینڈ نے شاندار آل راؤنڈ کارکردگی دکھاتے ہوئے سری لنکا کو 119 رنز کے بڑے مارجن سے شکست دے دی اور تین میچوں کی سیریز میں 0-1 کی برتری حاصل کر لی۔
انگلینڈ نے پہلے بیٹنگ کرتے ہوئے مقررہ 20 اوورز میں 4 وکٹوں کے نقصان پر 254 رنز کا بڑا مجموعہ ترتیب دیا۔ کپتان ہیری بروک نے جارحانہ انداز اپناتے ہوئے 49 گیندوں پر ناقابل شکست 114 رنز بنائے۔ ان کی اننگز میں 10 چوکے اور 6 چھکے شامل تھے، جبکہ انہوں نے اپنی سنچری صرف 42 گیندوں پر مکمل کی۔
سابق کپتان جوز بٹلر نے بھی تیز رفتار بیٹنگ کا مظاہرہ کیا اور 44 گیندوں پر 80 رنز اسکور کیے۔ بروک اور بٹلر کے درمیان 60 گیندوں پر 128 رنز کی شراکت نے انگلینڈ کو مضبوط پوزیشن میں پہنچا دیا۔ ول جیکس نے 12 گیندوں پر 21 رنز بنائے۔
ہدف کے تعاقب میں سری لنکن بیٹنگ لائن انگلش بولرز کے سامنے دباؤ کا شکار رہی اور پوری ٹیم 19 اوورز میں 135 رنز بنا کر آؤٹ ہو گئی۔ دونتھ ویلالاگے نے 21 گیندوں پر 33 رنز کے ساتھ اپنی ٹیم کی جانب سے سب سے زیادہ اسکور کیا، جبکہ داسن شناکا نے 14 گیندوں پر 24 رنز بنائے۔
انگلینڈ کی جانب سے سونی بیکر سب سے کامیاب بولر رہے، جنہوں نے چار اوورز میں صرف 12 رنز دے کر 3 وکٹیں حاصل کیں۔ جیمی اوورٹن اور لیئم ڈاسن نے دو، دو کھلاڑیوں کو آؤٹ کیا۔
میچ میں فیصلہ کن سنچری بنانے پر ہیری بروک کو پلیئر آف دی میچ قرار دیا گیا۔ اس کامیابی کے ساتھ ٹی ٹوئنٹی انٹرنیشنلز میں سری لنکا کے خلاف انگلینڈ کی مسلسل فتوحات کا سلسلہ 13 میچوں تک پہنچ گیا۔ سیریز کا دوسرا ٹی ٹوئنٹی جمعرات، 17 ستمبر کو کارڈف میں کھیلا جائے گا۔
