لاہور: لاہور گیریژن پولو گراؤنڈز میں جمعہ کو کھیلے گئے 12ویں بیٹل ایکس پولو ٹورنامنٹ 2026 کے مقابلوں میں ڈائمنڈ پینٹس/پلاٹینم ہومز اور ایف جی دین/شیخو نے شاندار کامیابیوں کے ساتھ مین فائنل کے لیے کوالیفائی کر لیا۔
تیز رفتار اور سنسنی خیز پولو کے اس دن دونوں فاتح ٹیموں نے بہتر ٹیم ورک، مؤثر فنشنگ اور مضبوط حکمت عملی کا مظاہرہ کرتے ہوئے اپنے حریفوں کو زیر کیا اور چیمپئن شپ مقابلے کے لیے جگہ بنا لی۔
دن کے پہلے میچ میں ڈائمنڈ پینٹس/پلاٹینم ہومز نے سخت مقابلے کے بعد ڈائمنڈ پینٹس/امپیریل کو 8-9 سے شکست دی۔ فاتح ٹیم کی جانب سے ثاقب خاکوانی نمایاں رہے جنہوں نے پانچ گول اسکور کیے، جن میں تین فیلڈ گول اور دو 30 یارڈ پنالٹیز شامل تھیں۔ میر حذیفہ نے اہم ہیٹ ٹرک کرتے ہوئے تین فیلڈ گول کیے، جبکہ ابراہیم خلیل نے ایک گول بنا کر ٹیم کا مجموعہ مکمل کیا۔
ڈائمنڈ پینٹس/امپیریل کی طرف سے بلال حئی نے بھرپور مزاحمت کی اور چار گول اسکور کیے، جن میں تین فیلڈ گول اور ایک 30 یارڈ پنالٹی شامل تھی۔ راجہ جلال ارسلان نے تین گول بنائے، جن میں دو فیلڈ گول اور ایک 30 یارڈ پنالٹی تھی، جبکہ ابراہیم نوید شیخ نے دو گول کیے۔ چوتھے چکر میں ان کی ٹیم نے بھرپور واپسی کی کوشش کی، تاہم ایک گول کے فرق سے پیچھے رہ گئی۔
دوسرے میچ میں ایف جی دین/شیخو نے غالب کھیل پیش کرتے ہوئے ماسٹر پینٹس کو 7-11 سے ہرا دیا۔ اسٹار کھلاڑی حمزہ معاذ خان شاندار فارم میں دکھائی دیے اور انہوں نے ماسٹر پینٹس کے دفاع کو مسلسل دباؤ میں رکھتے ہوئے سات گول اسکور کیے۔ ان کے گولز میں چھ فیلڈ گول اور ایک 40 یارڈ پنالٹی شامل تھی۔
حمزہ معاذ خان کو عثمان عزیز انور، فرہاد شیخ اور عباس مختار کی بھرپور معاونت حاصل رہی، جنہوں نے ایک ایک فیلڈ گول کیا، جبکہ ایک اون گول بھی ایف جی دین/شیخو کے حصے میں آیا۔ ماسٹر پینٹس کی جانب سے راجہ میکائیل سمیع نے تنہا بھرپور مقابلہ کیا اور اپنی ٹیم کے سات میں سے چھ گول اسکور کیے۔ ان میں تین فیلڈ گول، ایک 30 یارڈ پنالٹی، ایک 40 یارڈ پنالٹی اور ایک اسپاٹ پنالٹی شامل تھی۔ صوفی محمد ہارون نے ایک فیلڈ گول کیا۔
دلچسپ اور سنسنی خیز میچز کو کلب سیکرٹری میجر بابر محبوب اعوان (ریٹائرڈ) کے علاوہ متعدد سابق پولو کھلاڑیوں، ان کے اہل خانہ اور پولو کے شائقین نے دیکھا اور خوب محظوظ ہوئے۔
