راولپنڈی: پیر مہر علی شاہ بارانی زرعی یونیورسٹی راولپنڈی میں 23 سے 29 نومبر 2026 تک ’’سٹوڈنٹس ویک 2026‘‘ منایا جائے گا۔ یہ ہفتہ وائس چانسلر پروفیسر ڈاکٹر قمر الزمان کے وژن کے تحت طلباء و طالبات کی تعلیمی، فکری، تخلیقی اور جسمانی صلاحیتوں کے فروغ اور شخصیت کی ہمہ جہت تعمیر کے لیے منعقد کیا جا رہا ہے۔
ڈائریکٹوریٹ آف سٹوڈنٹ افیئرز کے زیر اہتمام ہونے والے اس پروگرام کا مقصد طلبہ کو نصابی سرگرمیوں کے روایتی دائرے سے آگے بڑھ کر اپنی صلاحیتوں کے اظہار، عملی تجربہ حاصل کرنے اور قائدانہ مہارتیں بہتر بنانے کے مواقع فراہم کرنا ہے۔
وائس چانسلر پروفیسر ڈاکٹر قمر الزمان نے اپنے خصوصی پیغام میں کہا کہ یونیورسٹی کا بنیادی ہدف طلباء و طالبات میں خود اعتمادی، بصیرت، تخلیقی سوچ اور قیادت کی صلاحیتیں پیدا کرنا ہے تاکہ وہ مستقبل کے چیلنجز کا مؤثر طور پر سامنا کر سکیں اور ملک کی ترقی و خوشحالی میں مثبت کردار ادا کریں۔
انہوں نے کہا کہ سٹوڈنٹس ویک جیسی جامع سرگرمیاں طلبہ کے لیے اپنی پوشیدہ صلاحیتوں کو پہچاننے اور نکھارنے کا اہم پلیٹ فارم ثابت ہوتی ہیں۔ ان کے مطابق اس نوعیت کے پروگرام باہمی تعاون، ٹیم ورک، نظم و ضبط اور برداشت جیسی اقدار کو فروغ دینے میں بھی مددگار ہیں۔
سٹوڈنٹس ویک 2026 کے دوران علمی، ادبی، ثقافتی، تفریحی اور کھیلوں سے متعلق مختلف سرگرمیاں منعقد کی جائیں گی۔ پروگرام میں سیمینارز، تربیتی ورکشاپس، سپورٹس گالا، پھولوں کی نمائش، جاب فیئر، فوڈ اور ایگریکلچرل نمائشیں سمیت طلباء و طالبات کے مابین متعدد مقابلے شامل ہوں گے۔
ان سرگرمیوں کے ذریعے طلبہ کو اپنی تخلیقی صلاحیتوں، فنی مہارتوں، تحقیقی رجحانات اور عملی قابلیت کے اظہار کا موقع ملے گا۔ اس کے ساتھ ساتھ مختلف شعبوں سے وابستہ ماہرین، پیشہ ور افراد اور اداروں کے ساتھ روابط اور نیٹ ورکنگ کے امکانات بھی پیدا ہوں گے۔
