راولپنڈی، 5 اگست 2026ء — راولپنڈی کنٹونمنٹ بورڈ کے نائب صدر زاہد بختاوری نے کہا ہے کہ رشوت کو مسترد کرنا اور دیانت دارانہ کاروباری روایات کو فروغ دینا ایک کامیاب، شفاف اور مضبوط تجارتی نظام کی اصل بنیاد ہے۔ ان کے مطابق خوشحال معاشرے اور مستحکم معیشت کے لیے ایمانداری، قانون کی پاسداری اور باہمی تعاون ناگزیر ہیں۔
زاہد بختاوری نے کہا کہ اگر تاجر برادری دیانت داری کو اپنا رہنما اصول بنا لے تو اس سے نہ صرف کاروباری ماحول بہتر ہوگا بلکہ عوامی اعتماد بھی مضبوط ہوگا۔
انہوں نے ان خیالات کا اظہار راولپنڈی چیمبر آف کامرس اینڈ انڈسٹری کے صدر عثمان شوکت، گروپ لیڈر سہیل الطاف اور کاروباری برادری کی دیگر نمایاں شخصیات سے ملاقات کے دوران کیا۔ اس موقع پر آر سی سی آئی کے عہدیداروں نے زاہد بختاوری کی خدمات کے اعتراف میں انہیں پھولوں کا گلدستہ پیش کیا اور نیک خواہشات کا اظہار کیا۔ ان کے ہمراہ مرکزی تنظیم تاجران کینٹ رجسٹرڈ راولپنڈی کے نائب صدر شہزاد چوہدری، وائس چیئرمین متین خان اور چیئرمین رفیق بھٹیہ بھی موجود تھے۔
ملاقات میں باہمی دلچسپی کے امور، تاجر برادری کو درپیش مشکلات، تجارتی سرگرمیوں کے فروغ اور مسائل کے حل کے لیے مشترکہ حکمت عملی کی تشکیل پر تفصیلی تبادلہ خیال کیا گیا۔
گروپ لیڈر سہیل الطاف نے زاہد بختاوری کو تاجر برادری کا قیمتی اثاثہ قرار دیتے ہوئے کہا کہ راولپنڈی چیمبر آف کامرس اینڈ انڈسٹری ہر مثبت اقدام میں ان کی حمایت جاری رکھے گا۔ انہوں نے کہا کہ زاہد بختاوری تاجر برادری اور کینٹ کے رہائشیوں کے حقوق اور مسائل کی مؤثر نمائندگی کر رہے ہیں، جبکہ گزشتہ نو ماہ کی کارکردگی ان کی عوامی خدمت کے جذبے کا واضح ثبوت ہے۔
آر سی سی آئی کے صدر عثمان شوکت نے کہا کہ چیمبر کو زاہد بختاوری کی کارکردگی پر فخر ہے۔ انہوں نے عوامی خدمت کے لیے ان کی لگن، شفاف طرز حکمرانی اور تاجروں کے مسائل کے حل کے لیے کی گئی کوششوں کو سراہتے ہوئے کہا کہ ان خدمات کو طویل عرصے تک یاد رکھا جائے گا۔ راجہ عامر سبھا نے بھی زاہد بختاوری کی کاوشوں کی تعریف کی اور مکمل تعاون کی یقین دہانی کرائی۔
اس موقع پر سہیل الطاف نے زاہد بختاوری کو دعوت دی کہ وہ پرویز اسلم گروپ کے ساتھ قریبی رابطے میں کام کریں اور آئندہ چیمبر آف کامرس انتخابات میں بھرپور تعاون کریں۔
زاہد بختاوری نے گفتگو کرتے ہوئے کہا کہ عوام اور تاجر برادری کے لیے ان کے دروازے ہمیشہ کھلے ہیں، جس کسی کو بھی کوئی مسئلہ درپیش ہو وہ براہ راست رابطہ کر سکتا ہے۔ انہوں نے یقین دہانی کرائی کہ راولپنڈی کنٹونمنٹ بورڈ سے متعلق ہر شہری کے ساتھ منصفانہ، شفاف اور قانون کے مطابق سلوک کیا جائے گا۔
انہوں نے رشوت کو معاشرتی برائی قرار دیتے ہوئے کہا کہ یہ اداروں اور معاشرے کو کمزور کرتی ہے۔ زاہد بختاوری نے شہریوں پر زور دیا کہ اگر راولپنڈی کنٹونمنٹ بورڈ کا کوئی ملازم رشوت طلب کرے یا وصول کرے تو فوری طور پر اطلاع دی جائے تاکہ ذمہ داروں کے خلاف فوری قانونی کارروائی کی جا سکے۔
موجودہ معاشی صورت حال کا ذکر کرتے ہوئے انہوں نے کہا کہ تاجر برادری کو اس وقت متعدد مشکلات کا سامنا ہے جن کے لیے عملی اور مؤثر حل ضروری ہیں۔ ان کا کہنا تھا کہ تاجر پاکستان کی معیشت میں ریڑھ کی ہڈی کی حیثیت رکھتے ہیں، اس لیے ان کے مسائل ترجیحی بنیادوں پر حل ہونے چاہئیں۔ انہوں نے مزید کہا کہ تاجروں کو عزت دی جانی چاہیے اور اہم فیصلوں میں ان سے مشاورت کی جانی چاہیے تاکہ کاروباری ترقی اور معاشی بہتری کے لیے سازگار ماحول پیدا ہو سکے۔
