پاکستان سوسائٹی آف ایمرجنسی میڈیسن کے انتخابات مکمل، نئی کابینہ منتخب
اسلام آباد: پاکستان سوسائٹی آف ایمرجنسی میڈیسن کے تحت 3 مئی 2026 کو تیسری کابینہ کے انتخابات کامیابی سے منعقد ہوئے، جن میں ملک بھر سے ایمرجنسی میڈیسن سے وابستہ ماہرین نے بھرپور شرکت کی۔
انتخابات میں پاکستان کے مختلف علاقوں سے تعلق رکھنے والے 10 امیدواروں نے حصہ لیا، جو ایمرجنسی میڈیسن کمیونٹی میں بڑھتی ہوئی سرگرمی اور یکجہتی کا مظہر ہے۔
شفاف اور مسابقتی انتخابی عمل کے بعد منتخب ہونے والی نئی کابینہ کے ارکان میں صدر ڈاکٹر عبدالسلام خان (شفا انٹرنیشنل ہسپتال)، نائب صدر ڈاکٹر عرفان حبیب (چائلڈ لائف فاؤنڈیشن)، جنرل سیکرٹری ڈاکٹر شاہان وحید (آغا خان یونیورسٹی ہسپتال کراچی)، سوشل سیکرٹری ڈاکٹر نورالعین (آغا خان) اور سیکرٹری میڈیا و پبلی کیشنز ڈاکٹر زرین قاسمی (چائلڈ لائف فاؤنڈیشن) شامل ہیں۔
پی ایس ای ایم کے نمائندے علی حسن سرہیو کے مطابق انتخابات میں 200 سے زائد ایمرجنسی فزیشنز اور ٹرینی ڈاکٹرز نے حصہ لیا، جبکہ ووٹنگ کا عمل الیکٹرانک طریقے سے مکمل کیا گیا تاکہ شفافیت اور مساوی مواقع کو یقینی بنایا جا سکے۔
اس موقع پر سبکدوش ہونے والے صدر ڈاکٹر خواجہ جنید مصطفیٰ نے ایمرجنسی میڈیسن سے وابستہ افراد پر زور دیا کہ وہ تنظیمی سرگرمیوں میں بڑھ چڑھ کر حصہ لیں، جبکہ تمام امیدواروں کی کاوشوں کو سراہتے ہوئے ان کے لیے نیک تمناؤں کا اظہار بھی کیا۔
نئی کابینہ کی حلف برداری کی تقریب 9 مئی 2026 کو شام 5 بجے منعقد ہوگی۔ پی ایس ای ایم نے نومنتخب قیادت کو مبارکباد پیش کرتے ہوئے اس عزم کا اعادہ کیا ہے کہ پاکستان میں ایمرجنسی طبی سہولیات کے فروغ کے لیے اپنی کوششیں جاری رکھے گی۔
