پشاور (6 نومبر 2026): ہلال احمر پاکستان نے ترکیہ ہلال احمر سوسائٹی کے تعاون سے پشاور میں دیر کالونی اسکول کے المناک واقعے سے متاثر ہونے والے خاندانوں کے لیے خوراکی امداد کی تقسیم کا اہتمام کیا، جس کے تحت 70 متاثرہ خاندانوں کو ضروری اشیائے خورونوش پر مشتمل پیکجز فراہم کیے گئے۔
ہلال احمر پاکستان کے مطابق ہر فوڈ پیکج 54 کلوگرام اشیائے ضرورت پر مشتمل تھا، جس میں آٹا، چاول، کوکنگ آئل، مسور کی دال، مونگ، سفید چنے، چینی، چائے اور نمک شامل تھے۔ اس امداد کا مقصد متاثرہ خاندانوں کی بنیادی غذائی اور گھریلو ضروریات کو پورا کرنے میں مدد دینا تھا۔
یہ اقدام دیر کالونی اسکول پشاور کے افسوسناک واقعے سے متاثرہ خاندانوں کی معاونت کے لیے کیا گیا، جس میں متعدد اسکول بچے اور اساتذہ جاں بحق ہوئے جبکہ کئی افراد زخمی بھی ہوئے۔
اس موقع پر ہلال احمر پاکستان کے سیکرٹری جنرل محمد عبیداللہ خان نے کہا کہ ہلال احمر پاکستان دیر کالونی اسکول کے المناک سانحے سے متاثرہ خاندانوں کے ساتھ یکجہتی کا اظہار کرتا ہے۔ انہوں نے کہا کہ معصوم بچوں اور اساتذہ کا جانی نقصان نہایت دل خراش ہے اور ادارہ متاثرہ خاندانوں کو درپیش مشکلات کا مکمل ادراک رکھتا ہے۔
محمد عبیداللہ خان کا کہنا تھا کہ اس امدادی سرگرمی کے ذریعے ہلال احمر پاکستان نے 70 خاندانوں کو فوری خوراکی مدد فراہم کی ہے۔ انہوں نے ترکیہ ہلال احمر سوسائٹی کے تعاون کو قابل قدر قرار دیا اور چیئرپرسن ہلال احمر پاکستان مسز فرزانہ نائیک کی رہنمائی اور قیادت کو بھی سراہا، جن کے باعث ادارے کا انسانی خدمت کا جذبہ اور کمزور طبقات تک رسائی کا عمل مزید مضبوط ہو رہا ہے۔
پاکستان میں ترکیہ ہلال احمر سوسائٹی کے ہیڈ آف ڈیلیگیشن مسٹر کان سانر نے کہا کہ ترکیہ ہلال احمر انسانی ہنگامی صورتحال اور مشکل حالات سے متاثرہ کمیونٹیز کی مدد کے لیے پرعزم ہے۔ ان کے مطابق ہلال احمر پاکستان کے ساتھ تعاون دونوں قومی سوسائٹیز کے درمیان دیرینہ دوستی، یکجہتی اور انسانی ہمدردی پر مبنی شراکت داری کا مظہر ہے۔
مسٹر کان سانر نے امید ظاہر کی کہ یہ خوراکی امداد متاثرہ 70 خاندانوں کے لیے موجودہ مشکل حالات میں کسی حد تک آسانی کا باعث بنے گی۔ انہوں نے ہلال احمر پاکستان کے ساتھ شراکت داری کو اہم قرار دیتے ہوئے پاکستان بھر میں کمزور اور ضرورت مند کمیونٹیز کی مدد کے لیے مشترکہ کام جاری رکھنے کے عزم کا اعادہ کیا۔
ہلال احمر پاکستان خیبر پختونخوا برانچ کے چیئرمین فرزند علی وزیر نے کہا کہ دیر کالونی اسکول کا واقعہ متاثرہ خاندانوں اور وسیع تر مقامی برادری پر گہرا اثر چھوڑ گیا ہے۔ انہوں نے کہا کہ ایسے حالات میں متاثرین کے ساتھ کھڑا ہونا اور عملی انسانی امداد فراہم کرنا اجتماعی ذمہ داری ہے۔
فرزند علی وزیر نے متاثرہ خاندانوں کو ضروری خوراکی پیکجز کی بروقت فراہمی پر ہلال احمر پاکستان نیشنل ہیڈکوارٹرز اور ترکیہ ہلال احمر سوسائٹی کے تعاون کا شکریہ ادا کیا۔ انہوں نے چیئرپرسن ہلال احمر پاکستان مسز فرزانہ نائیک کی قیادت اور رہنمائی کو بھی سراہا، جن کی معاونت سے ضرورت مند کمیونٹیز کے لیے انسانی امدادی اقدامات کو تقویت مل رہی ہے۔
ہلال احمر پاکستان خیبر پختونخوا برانچ کے صوبائی سیکرٹری عابد رحمان مروت نے بھی امدادی سرگرمی کے انعقاد میں ہلال احمر پاکستان نیشنل ہیڈکوارٹرز کی قیادت اور ترکیہ ہلال احمر سوسائٹی کی ٹیموں کی معاونت، تعاون اور سہولت کاری کو سراہا۔
امداد حاصل کرنے والے خاندانوں نے بروقت خوراکی مدد فراہم کرنے پر ہلال احمر پاکستان اور ترکیہ ہلال احمر سوسائٹی کا شکریہ ادا کیا۔ انہوں نے کہا کہ مشکل وقت میں ان کے ساتھ کھڑا ہونا اور ضروری اشیائے خورونوش کی فراہمی ان کی فوری گھریلو ضروریات پوری کرنے میں مددگار ثابت ہوگی۔
