اسلام آباد میں انسداد دہشت گردی کے حوالے سے پاکستان اور روس کے مشترکہ ورکنگ گروپ کا بارہواں اجلاس منعقد ہوا، جس میں دونوں ممالک کے اعلیٰ حکام نے شرکت کی۔ اس مذاکراتی عمل کی قیادت وزارت خارجہ کے ایڈیشنل سیکرٹری سفیر محمد خالد خان جمالی اور روسی فیڈریشن کے نائب وزیر خارجہ مسٹر دیمتری لیوبنسکی نے کی۔اجلاس میں خطے کو درپیش دہشت گردی کے خطرات پر تفصیلی تبادلۂ خیال کیا گیا، جبکہ خاص طور پر افغانستان سے جنم لینے والی دہشت گردی اور اس کے ہمسایہ ممالک پر ممکنہ اثرات پر توجہ دی گئی۔ دونوں وفود نے اس امر کو اہم قرار دیا کہ ایسے عناصر سے علاقائی سلامتی کو لاحق خطرات مسلسل نگرانی اور باہمی رابطے کے ذریعے ہی مؤثر انداز میں کم کیے جا سکتے ہیں۔مذاکرات کے دوران پاکستان اور روس کے درمیان انسداد دہشت گردی کے شعبے میں موجود تعاون کا جائزہ بھی لیا گیا۔ اس موقع پر اس بات پر غور کیا گیا کہ دو طرفہ رابطوں کو مزید مؤثر بنانے کے ساتھ ساتھ علاقائی اور عالمی سطح پر بھی اشتراکِ عمل کو فروغ دیا جائے۔فریقین نے اقوام متحدہ اور شنگھائی تعاون تنظیم سمیت مختلف بین الاقوامی فورمز پر تعاون کو وسعت دینے کے امکانات پر بھی بات کی۔ اجلاس میں اس رائے کا اظہار کیا گیا کہ مشترکہ کوششیں نہ صرف دہشت گردی کے خلاف لائحۂ عمل کو مضبوط بناتی ہیں بلکہ خطے میں امن و استحکام کے لیے بھی مددگار ثابت ہوتی ہیں۔اسلام آباد میں ہونے والا یہ اجلاس دونوں ممالک کے درمیان انسداد دہشت گردی کے سلسلے میں جاری رابطوں کا حصہ ہے، جس کا مقصد بدلتے ہوئے علاقائی حالات میں مشترکہ موقف اور عملی تعاون کو زیادہ مؤثر بنانا ہے۔
پاکستان روس انسداد دہشت گردی گروپ کا اہم اجلاس اسلام آباد میں
کوئی تبصرہ نہیں ہے۔
