سابق وزیر خارجہ ایکواڈور اور اقوام متحدہ کے سیکرٹری جنرل کے عہدے کی امیدوار محترمہ ماریہ فرنانڈا ایسپینوسا نے آج نائب وزیراعظم و وزیر خارجہ سینیٹر محمد اسحاق ڈار سے ملاقات کی۔
ملاقات میں اسحاق ڈار نے محترمہ ماریہ فرنانڈا ایسپینوسا کا خیرمقدم کرتے ہوئے کثیرالجہتی نظام کو مضبوط بنانے اور عالمی امور میں اقوام متحدہ کے مرکزی کردار کو یقینی بنانے کے لیے پاکستان کی مکمل حمایت کا اظہار کیا۔
انہوں نے امید ظاہر کی کہ نئے سیکرٹری جنرل اقوام متحدہ میں ضروری اصلاحات کریں گے اور سلامتی کونسل کی طویل عرصے سے زیر التوا قراردادوں پر عملدرآمد کو یقینی بنائیں گے، خصوصاً فلسطین اور جموں و کشمیر کے حوالے سے، جو مشرق وسطیٰ اور جنوبی ایشیا میں دیرپا امن کے لیے اہم ہیں۔
نائب وزیراعظم و وزیر خارجہ نے اس عزم کا اعادہ بھی کیا کہ پاکستان اقوام متحدہ کے منشور کے مقاصد اور اصولوں، بین الاقوامی قانون اور معاہدوں کے احترام، اور عالمی امن و خوشحالی کے لیے فعال بین الاقوامی تعاون کے فروغ کے لیے کام جاری رکھے گا۔
