اسلام آباد: ہائیر ایجوکیشن کمیشن (ایچ ای سی) سیکرٹریٹ اسلام آباد میں تعلیمی اداروں میں منشیات کی روک تھام، آگاہی اور کنٹرول اقدامات کے حوالے سے اجلاس منعقد ہوا۔
اجلاس کی صدارت رکن قومی اسمبلی اور وزارتِ وفاقی تعلیم و پیشہ ورانہ تربیت کی پارلیمانی سیکرٹری محترمہ رابعہ نسیم فاروقی نے کی۔ اجلاس میں منشیات کے استعمال اور فراہمی کے رپورٹ ہونے والے کیسز کا جائزہ لیا گیا، جبکہ احتیاطی اقدامات، ادارہ جاتی نگرانی، آگاہی سرگرمیوں اور مختلف اداروں کے درمیان رابطہ کاری کو مزید مضبوط بنانے پر غور کیا گیا۔
چیئرمین ایچ ای سی پروفیسر ڈاکٹر نیاز احمد اختر (ستارۂ امتیاز) نے محفوظ اور صحت مند تعلیمی ماحول کی اہمیت پر زور دیتے ہوئے کہا کہ اعلیٰ تعلیمی اداروں میں منشیات اور تمباکو کے استعمال سے نمٹنے کے لیے ادارہ جاتی ذمہ داری، احتیاطی آگاہی اور مربوط کوششیں ناگزیر ہیں۔
ایچ ای سی کے ڈائریکٹر جنرل ریسرچ اینڈ اینالیسس ایکٹیویٹیز (آر اینڈ اے اے) انجینئر سلیم اللہ سوہو نے اجلاس کی چیئر کو 2025 اور جنوری تا ستمبر 2026 کے دوران رپورٹ ہونے والے کیسز سے متعلق بریفنگ دی۔ انہوں نے منشیات اور تمباکو کے استعمال کے تدارک کے لیے ایچ ای سی اور اعلیٰ تعلیمی اداروں کی جانب سے کیے گئے اقدامات سے بھی آگاہ کیا۔
اینٹی نارکوٹکس فورس (اے این ایف) اور اسلام آباد کیپیٹل ٹیریٹری (آئی سی ٹی) پولیس کے نمائندوں نے نفاذِ قانون اور روک تھام سے متعلق اقدامات پر تازہ صورتِ حال پیش کی۔ انہوں نے مربوط کارروائی، ادارہ جاتی جواب دہی اور آگاہی مہمات کی اہمیت کو اجاگر کیا۔
اجلاس میں یہ تجویز بھی دی گئی کہ اسلام آباد کے سرکاری اور نجی اعلیٰ تعلیمی اداروں کے سربراہان اور ان اداروں کی انسدادِ منشیات و تمباکو کمیٹیوں کے ارکان کے ساتھ ایک راؤنڈ ٹیبل منعقد کیا جائے، تاکہ عمل درآمد کا جائزہ لیا جا سکے اور آئندہ کے لیے مشترکہ لائحہ عمل تشکیل دیا جا سکے۔
