اسلام آباد، 29 جولائی 2026ء: وفاقی نظامتِ تعلیمات (ایف ڈی ای) کے ڈیجیٹل ہب کنیکٹڈ کلاس رومز منصوبے کو پبلک سیکٹر انوویشن آف دی ایئر کی کیٹیگری میں بہترین منصوبہ قرار دے دیا گیا۔
یہ منصوبہ سیکرٹری تعلیم جناب ندیم محبوب کی وژنری قیادت اور رہنمائی میں نافذ کیا گیا۔ قومی سطح کی تقریب ایشیائی ترقیاتی بینک (اے ڈی بی) اور ٹیک ایڈوائزری فورم کے زیر اہتمام منعقد ہوئی۔
تقریب میں ایوارڈز وفاقی وزیر برائے انفارمیشن ٹیکنالوجی و ٹیلی کمیونیکیشن محترمہ شزہ فاطمہ خواجہ نے بطور مہمانِ خصوصی، ایشیائی ترقیاتی بینک کے نمائندے کے ہمراہ پیش کیے۔ اس موقع پر اعلیٰ سرکاری حکام، ترقیاتی شراکت دار اور ٹیکنالوجی شعبے کی نمایاں شخصیات بھی موجود تھیں۔
ڈیجیٹل ہب کنیکٹڈ کلاس رومز منصوبے نے پاکستان کے تعلیمی اداروں اور اوورسیز پاکستانی اسکولز میں تدریس و تعلیم کے ماحول میں نمایاں تبدیلی پیدا کی ہے۔ اس اقدام کے تحت کلاس رومز کو ڈیجیٹل ٹیکنالوجی کے ذریعے منسلک کیا گیا، ماہرین کی رہنمائی میں تدریس کی سہولت فراہم ہوئی، معیاری تعلیمی وسائل تک رسائی وسیع ہوئی اور شہری و دیہی اسکولوں کے طلبہ کے لیے مساوی تعلیمی مواقع کو یقینی بنایا گیا۔
اس منصوبے کے ذریعے اساتذہ کی ڈیجیٹل صلاحیتوں کو بھی مضبوط کیا گیا اور ٹیکنالوجی پر مبنی تعلیم کے لیے ایک پائیدار نظام تشکیل دینے میں مدد ملی۔
یہ اعتراف وزارتِ تعلیم اور وفاقی نظامتِ تعلیمات کے اس مسلسل عزم کی عکاسی کرتا ہے کہ تعلیم کو جدید، اختراعی اور ٹیکنالوجی پر مبنی حل کے ذریعے بہتر بنایا جائے۔ یہ پیش رفت پاکستان کے ہر بچے کے لیے قابلِ رسائی، جامع اور معیاری تعلیم کی فراہمی کے وژن کو بھی مزید تقویت دیتی ہے۔
