اسلام آباد: ڈرگ ریگولیٹری اتھارٹی آف پاکستان (ڈریپ) نے عالمی ادارہ صحت (ڈبلیو ایچ او) کے تعاون سے 28 اور 29 اکتوبر 2026 کو اسلام آباد میں دو روزہ قومی ورکشاپ منعقد کی، جس کا مقصد اداروں کی لائسنسنگ اور گڈ اسٹوریج اینڈ ڈسٹری بیوشن پریکٹسز (جی ایس ڈی پی) کو مضبوط بنانا تھا۔
یہ ورکشاپ ڈبلیو ایچ او کے گلوبل بینچ مارکنگ ٹول (جی بی ٹی) کے تحت منعقد ہوئی، جس میں وفاقی اور صوبائی سطح کے ریگولیٹری نمائندوں نے شرکت کی۔
ورکشاپ کے دوران ریگولیٹری ہم آہنگی، خطرات کی بنیاد پر معائنے، جی ایس ڈی پی پر عمل درآمد، ریگولیٹری خلا کی نشاندہی اور پاکستان کے ریگولیٹری نظام کو بہتر بنانے کے لیے وقت کے پابند عملی منصوبوں کی تیاری پر تبادلہ خیال کیا گیا۔
شرکا نے پاکستان کے لیے ایک مربوط، ہم آہنگ اور مضبوط ریگولیٹری فریم ورک کی ضرورت پر زور دیا تاکہ لائسنسنگ، ذخیرہ کاری اور تقسیم کے نظام کو مزید مؤثر بنایا جا سکے۔
