اسلام آباد، 24 اگست 2026ء — عوام پاکستان کے مرکزی نائب صدر چوہدری انعام ظفر نے کہا ہے کہ حضور نبی کریم حضرت محمد صلی اللہ علیہ وآلہ وسلم کی ولادتِ باسعادت پوری انسانیت کے لیے رحمت، محبت، امن، برداشت اور بھائی چارے کا پیغام ہے۔ انہوں نے کہا کہ سیرتِ طیبہؐ انسانیت کے لیے بہترین نمونہ ہے اور اس کی تعلیمات پر عمل کر کے معاشرے میں بامعنی اور مثبت تبدیلی لائی جا سکتی ہے۔
عید میلاد النبی صلی اللہ علیہ وآلہ وسلم کے موقع پر اپنے پیغام میں چوہدری انعام ظفر نے کہا کہ اس مبارک دن کو منانے کی حقیقی روح یہ ہے کہ ہم نبی کریمؐ کی تعلیمات کو اپنی عملی زندگی کا حصہ بنائیں، اپنے کردار اور اخلاق کو بہتر کریں اور معاشرے میں محبت، رواداری، بھائی چارے اور خدمتِ انسانیت کو فروغ دیں۔
انہوں نے کہا کہ رسول اکرمؐ نے عدل، مساوات، شفقت اور دوسروں کے حقوق کے احترام کا درس دیا، اور آج ان اقدار کی پہلے سے کہیں زیادہ ضرورت ہے۔ چوہدری انعام ظفر کے مطابق ملک کو درپیش چیلنجز اور سماجی تقسیم پر قابو پانے کے لیے ضروری ہے کہ ہم سیرتِ نبویؐ سے رہنمائی حاصل کریں اور اتحاد، برداشت اور باہمی احترام کو فروغ دیں۔
چوہدری انعام ظفر نے کہا کہ نبی کریمؐ سے سچی محبت صرف عقیدت کے اظہار تک محدود نہیں بلکہ اس کا تقاضا ہے کہ آپؐ کی تعلیمات کو عملی طور پر اپنایا جائے۔ انہوں نے کہا کہ اس بابرکت موقع پر ہمیں عہد کرنا چاہیے کہ کمزور اور مستحق افراد کا سہارا بنیں، دکھی انسانیت کے ساتھ کھڑے ہوں اور معاشرے میں امن و محبت کے فروغ کے لیے اپنا کردار ادا کریں۔
انہوں نے مسلمانوں کو عید میلاد النبی صلی اللہ علیہ وآلہ وسلم کی مبارکباد دیتے ہوئے دعا کی کہ اللہ تعالیٰ پاکستان کو امن، خوشحالی اور استحکام عطا فرمائے اور ہمیں سیرتِ نبویؐ پر خلوصِ نیت سے عمل کرنے کی توفیق دے۔ آمین۔
