راولپنڈی: پیر مہر علی شاہ بارانی زرعی یونیورسٹی راولپنڈی کی فیکلٹی آف ایگریکلچرل انجینئرنگ اینڈ ٹیکنالوجی نے چین کی ہینان یونیورسٹی میں منعقدہ جیو اسٹیپ انٹرنیشنل سمر اسکول میں کامیاب شرکت کے ذریعے پاکستان اور چین کے درمیان علمی و سائنسی روابط کو مزید مضبوط بنانے میں اہم کردار ادا کیا ہے۔
پریس ریلیز کے مطابق بین الاقوامی سمر اسکول میں مجموعی طور پر 50 شرکاء شریک ہوئے، جن میں 26 بین الاقوامی شرکاء بھی شامل تھے۔ اس پروگرام نے علمی تبادلے، سائنسی گفتگو اور بین الثقافتی سیکھنے کے لیے ایک متنوع اور مؤثر پلیٹ فارم فراہم کیا۔
بارانی زرعی یونیورسٹی راولپنڈی کی نمائندگی کرتے ہوئے ایسوسی ایٹ پروفیسر ڈاکٹر طاہر اقبال نے “Smart Agriculture in Arid Regions: Localized Innovation and Practical Applications of Precision Agriculture Technologies in Pakistan” کے عنوان سے علمی لیکچر پیش کیا۔ انہوں نے اپنی پریزنٹیشن میں پاکستان کے خشک اور نیم خشک خطوں میں اسمارٹ سینسنگ، پریسیژن اریگیشن، پریسیژن ایگریکلچر اور موسمیاتی تبدیلیوں کے مقابلے کی صلاحیت رکھنے والی زراعت سے متعلق تجربات اور اختراعات کو اجاگر کیا۔
سمر اسکول کے دوران بارانی یونیورسٹی کے طلبہ نے بھی علمی پریزنٹیشنز میں فعال حصہ لیا اور اسٹوڈنٹ پریزنٹیشن مقابلے میں دوسری پوزیشن حاصل کی۔ یونیورسٹی کے لیے یہ کامیابی ایک بین الاقوامی علمی فورم پر نمایاں اعزاز قرار دی جا رہی ہے۔
پریس ریلیز کی تاریخ: 3 ستمبر 2026ء
