چکلالہ کنٹونمنٹ بورڈ کے انفورسمنٹ عملے پر رقم وصولی کے سنگین الزامات، ریڑھی بانوں سے 4,500 اور سوزوکی مالکان سے 7 ہزار روپے لینے کا دعویٰ
راولپنڈی: چکلالہ کنٹونمنٹ بورڈ کی انفورسمنٹ ٹیم کے خلاف مبینہ طور پر رقم وصولی اور تجاوزات کے خلاف کارروائیوں میں مبینہ بے ضابطگیوں کے سنگین الزامات سامنے آئے ہیں۔ شہریوں کا دعویٰ ہے کہ مختلف علاقوں میں سڑک کنارے ریڑھیاں لگانے والوں سے ایک ہزار سے 4,500 روپے جبکہ سوزوکی گاڑیوں کے مالکان اور آپریٹرز سے کاروبار جاری رکھنے کے عوض مبینہ طور پر 7 ہزار روپے تک وصول کیے جا رہے ہیں۔
شہریوں کے مطابق بارہا شکایات کے باوجود مختلف شاہراہوں اور عوامی مقامات پر ریڑھیوں، سوزوکی گاڑیوں، موٹر سائیکل لوڈرز اور لوڈر رکشوں کے ذریعے تجاوزات کا سلسلہ جاری ہے۔ ان کا الزام ہے کہ مبینہ طور پر رقم وصول کرکے ان افراد کو سرکاری جگہوں پر کاروبار کرنے کی اجازت دی جاتی ہے، جس کے باعث عام شہریوں کو آمدورفت میں مشکلات کا سامنا کرنا پڑتا ہے۔
شہریوں نے یہ الزام بھی عائد کیا ہے کہ انفورسمنٹ عملے کے بعض اہلکار مبینہ طور پر موبائل فون، سوشل میڈیا اور واٹس ایپ پیغامات کے ذریعے کارروائی سے قبل ہی ریڑھی بانوں اور دیگر تجاوزات قائم کرنے والوں کو آگاہ کر دیتے ہیں۔ شکایات کے مطابق جب کسی علاقے میں آپریشن متوقع ہوتا ہے تو ریڑھی بان عارضی طور پر اپنی ریڑھیاں ہٹا لیتے ہیں اور انفورسمنٹ ٹیم کے واپس جانے کے بعد دوبارہ اسی مقام پر آ جاتے ہیں۔
شہریوں کا کہنا ہے کہ اس صورتحال سے تجاوزات کے خلاف کارروائیوں کی افادیت پر سوالات اٹھ رہے ہیں، کیونکہ کارروائی کے باوجود وہی ریڑھیاں اور گاڑیاں کچھ ہی دیر بعد دوبارہ سڑکوں اور عوامی مقامات پر نظر آنے لگتی ہیں۔
اس حوالے سے مختلف علاقوں کے رہائشیوں نے شکایات درج کرائی ہیں، جن میں تحمس آباد کے احمد، رحیم آباد کے صادق اعوان، ٹِپو روڈ کے صادق نعیم اور چکلالہ ہاؤسنگ اسکیم تھری کے حفیظ شامل ہیں۔ شہریوں نے مبینہ رقم وصولی اور کارروائی کے بعد تجاوزات کی دوبارہ واپسی کے معاملے کی اعلیٰ سطح پر تحقیقات کا مطالبہ کیا ہے۔
شکایات میں انفورسمنٹ انچارج اخلاق سمیت عملے کے دیگر افراد ماجد شاہ، شبیر، شیراز ستی، عمران بھٹی اور صلاح الدین کے نام بھی شامل کیے گئے ہیں۔ تاہم، ان افراد کے خلاف عائد الزامات کی آزادانہ تصدیق ہونا ابھی باقی ہے۔
شہریوں کے مطابق مبینہ بے ضابطگیوں اور تجاوزات کا مسئلہ چکلالہ ہاؤسنگ اسکیم تھری، ڈھوک چراغ دین، ڈھوک کشمیریاں، ڈھوک چوہدریاں، گلستان کالونی، رحیم آباد، لالہ زار، تلسہ گاؤں، ٹِپو روڈ، دھری حسن آباد، مریر حسن، جھندا چیچی، تہما سپ آباد، بوسٹن ویلی اور بوسٹن خان روڈ سمیت متعدد علاقوں میں موجود ہے۔
الزامات کے حوالے سے رابطہ کرنے پر انفورسمنٹ انچارج اخلاق نے بتایا کہ محکمہ روزانہ کی بنیاد پر تجاوزات کے خلاف کارروائیاں کرتا ہے اور خلاف ورزی کرنے والوں پر جرمانے بھی عائد کیے جاتے ہیں۔ ان کا کہنا تھا کہ کمانڈر کی ہدایات پر ان دنوں صفائی مہم کا ہفتہ بھی جاری ہے، جس کے دوران انفورسمنٹ آپریشنز کیے جا رہے ہیں۔
جب ان سے سوال کیا گیا کہ کارروائی کے بعد ریڑھیاں دوبارہ اسی مقام پر کیسے پہنچ جاتی ہیں تو اخلاق نے کہا کہ محکمہ کارروائی ضرور کرتا ہے، تاہم ریڑھیاں بعد میں دوبارہ آ جاتی ہیں۔
ان کا جواب اس بات کی تصدیق کرتا ہے کہ تجاوزات کے خلاف کارروائیاں کی جا رہی ہیں، تاہم کارروائی کے باوجود ریڑھیوں کی بار بار واپسی شہریوں کے لیے بدستور تشویش کا باعث ہے۔ شہریوں کا کہنا ہے کہ عارضی کارروائیوں سے مسئلہ حل نہیں ہو رہا۔
شہریوں نے چکلالہ کنٹونمنٹ بورڈ کے اعلیٰ حکام سے مطالبہ کیا ہے کہ مبینہ رقم وصولی، کارروائی سے قبل واٹس ایپ کے ذریعے اطلاع دینے اور آپریشن کے بعد تجاوزات کی دوبارہ بحالی کے الزامات کی شفاف تحقیقات کرائی جائیں اور کسی بھی اہلکار کی بدعنوانی یا اختیارات کے ناجائز استعمال میں ملوث ہونے کی صورت میں اس کے خلاف سخت محکمانہ کارروائی عمل میں لائی جائے۔
