اسلام آباد: پاکستان نیشنل کونسل آف دی آرٹس (پی این سی اے)، نیشنل ہیریٹیج اینڈ کلچر ڈویژن کے زیر اہتمام پی این سی اے آڈیٹوریم اسلام آباد میں ایک دلکش موسیقی کی محفل ’’شامِ موسیقی‘‘ منعقد کی گئی۔
پروگرام میں معروف کلاسیکی موسیقار استاد اعجاز توکل خان، علی رضا توکل اور خیام حیدر توکل نے اپنے فن کا مظاہرہ کیا۔ فنکاروں نے پاکستانی موسیقی کی بھرپور روایات سے جڑی ہوئی روح پرور پیشکشوں اور مسحور کن پرفارمنسز کے ذریعے حاضرین کو محظوظ کیا۔
محفل میں کلاسیکی موسیقی اور روایتی دھنوں کا حسن نمایاں رہا، جبکہ روایتی آلاتِ موسیقی پر براہِ راست پرفارمنسز نے ماحول کو مزید دلکش بنا دیا۔ فنکاروں کی مہارت اور پُراثر اندازِ پیشکش نے آڈیٹوریم میں ایک سحر انگیز فضا قائم کی، جسے حاضرین نے بھرپور انداز میں سراہا۔
اس موقع پر موسیقی کے شائقین، فنکاروں، ثقافتی شخصیات اور عوام کی بڑی تعداد موجود تھی، جنہوں نے اس یادگار شام سے خوب لطف اٹھایا۔
یہ تقریب کلاسیکی اور روایتی موسیقی کے فروغ، نامور فنکاروں کو پلیٹ فارم فراہم کرنے اور پاکستان کے بھرپور موسیقی ورثے کے تحفظ کے لیے پی این سی اے کے مسلسل عزم کی عکاس تھی۔
