اسلام آباد: وفاقی جامعات اور اعلیٰ تعلیمی اداروں کے وائس چانسلرز اور ریکٹرز کا چوتھا ماہانہ فورم بحرہ یونیورسٹی اسلام آباد کے ہیڈ آفس میں منعقد ہوا، جس میں اعلیٰ تعلیم کے شعبے میں تعاون، معیار، تحقیق اور جدت کے فروغ پر تفصیلی غور کیا گیا۔
یہ فورم چھٹی انٹرنیشنل اسٹوڈنٹس کنونشن اینڈ ایکسپو میں ہونے والی مشاورت کے بعد ایک فالو اَپ اقدام کے طور پر قائم کیا گیا تھا، جس کا مقصد ملک بھر کے اعلیٰ تعلیمی اداروں کے درمیان روابط کو مضبوط بنانا ہے۔
اجلاس میں سرکاری اور نجی شعبے کی 25 سے زائد جامعات کے وائس چانسلرز اور ریکٹرز کے علاوہ ہائر ایجوکیشن کمیشن کے سینئر حکام نے شرکت کی۔ نیشنل سکلز یونیورسٹی اسلام آباد کی نمائندگی پروفیسر ڈاکٹر سعود الطاف نے کی۔
فورم کے دوران تعلیمی رہنماؤں کو اپنے تجربات کے تبادلے، اعلیٰ تعلیم کو درپیش نئے چیلنجز پر گفتگو اور بین الجامعاتی تعاون کے امکانات کا جائزہ لینے کا موقع ملا۔ شرکاء نے تعلیمی معیار، تحقیق و اختراع، ادارہ جاتی نظم و نسق، بین الاقوامی روابط، طلبہ کی ترقی اور ہنر مندی کے فروغ جیسے اہم موضوعات پر تبادلہ خیال کیا۔
اجلاس میں اس بات پر زور دیا گیا کہ موجودہ تعلیمی چیلنجز سے نمٹنے، تدریس و تحقیق میں بہتری لانے اور کمیونٹی انگیجمنٹ کو مضبوط بنانے کے لیے اعلیٰ تعلیمی اداروں کی مشترکہ کاوشیں نہایت اہم ہیں۔
اجلاس کا ایک اہم حصہ بحرہ یونیورسٹی کے سنٹر آف ایکسیلینس اِن آرٹیفیشل انٹیلی جنس کا دورہ تھا۔ اس موقع پر شرکاء کو مرکز کی تحقیقی ترجیحات، جاری منصوبوں اور مصنوعی ذہانت پر مبنی تعلیم، تحقیق، اختراع اور صنعت سے تعاون کے اقدامات کے بارے میں بریفنگ دی گئی۔ دورے کے دوران مصنوعی ذہانت کے اعلیٰ تعلیم اور قومی ترقی کے مستقبل پر اثرات کے حوالے سے بھی آگاہی فراہم کی گئی۔
اجلاس کے اختتام پر شریک اداروں نے پاکستان میں اعلیٰ تعلیم کی ترقی کے لیے مل کر کام کرنے کے عزم کا اعادہ کیا۔ شرکاء نے تعلیمی معیار، تحقیق و جدت، مؤثر گورننس اور ایسی ہنر مند افرادی قوت کی تیاری کو اپنی مشترکہ ترجیحات قرار دیا جو قومی اور عالمی چیلنجز کا مقابلہ کر سکے۔
شرکاء نے بحرہ یونیورسٹی کے وائس چانسلر ایڈمرل عابد حمید اور ان کی ٹیم کی جانب سے بہترین انتظامات، پرتپاک میزبانی اور کامیاب انعقاد پر شکریہ ادا کیا۔
