صدر ایف پی سی سی آئی عاطف اکرام شیخ نے پی آئی اے نجکاری کے پہلے مرحلے میں کامیاب بولی دہندہ عارف حبیب گروپ کو مبارکباد پیش کی اور کہا کہ یہ مرحلہ شفافیت اور تیزی کے ساتھ مکمل ہوا۔ انہوں نے کہا کہ بڈنگ میں شریک تمام کاروباری ادارے اعتماد کے قابل اور اچھی ساکھ کے حامل تھے جس سے عمل کی قانونی اور تجارتی ساکھ میں اضافہ ہوا۔عاطف اکرام شیخ نے حکومت کی کوششوں کو قابل ستائش قرار دیا اور وزیر اعظم شہباز شریف کی ذاتی سرپرستی کو اس سنگ میل کے حصول کا سبب بتایا۔ ان کا کہنا تھا کہ حکومت نے کاروباری برادری پر اعتماد کیا اور اس اعتماد کے مثبت اور دور رس نتائج سامنے آئیں گے جن سے معیشت کو بھی فائدہ ہوگا۔صدر فیڈریشن نے کہا کہ پاکستان کو سرکاری اداروں کے خسارے کی مد میں سالانہ اربوں روپے کا بوجھ اٹھانا پڑتا ہے، اس لیے خسارے کا شکار دیگر حکومتی اداروں سے جان چھڑانے کے لیے بروقت نجکاری ضروری ہے۔ انہوں نے واضح طور پر کہا کہ توانائی کے شعبے میں بھی جامع اصلاحات ناگزیر ہیں اور ڈسٹری بیوشن کمپنیز کی نجکاری کے بغیر یہ اصلاحات مکمل نہیں ہو سکتیں۔عاطف اکرام شیخ نے امید ظاہر کی کہ پی آئی اے کے بعد بجلی کی تقسیم کار کمپنیوں کی نجکاری بھی بروقت ممکن بنائی جائے گی تاکہ حکومت کے مالیاتی بوجھ میں کمی آئے اور شعبہ توانائی میں کارکردگی بہتر ہو۔ انہوں نے مزید کہا کہ شفاف بڈنگ عمل سے سرمایہ کاروں کا اعتماد بڑھے گا اور مستقبل میں مزید نجکاری منصوبوں کے لیے ماحول سازگار ہوگا۔انہوں نے حکومت اور شریک اداروں کی کارکردگی کو سراہتے ہوئے کہا کہ نجکاری کا یہ پہلا مرحلہ ایک مثبت مثال ہے اور اسی رویے کو اختیار کرتے ہوئے ملک بھر کے خسارہ زدہ اداروں کی نجکاری وقت پر مکمل کرنی چاہیے تاکہ عوامی وسائل کے بہتر استعمال کو یقینی بنایا جا سکے۔
پی آئی اے نجکاری کے کامیاب مرحلے پر مبارکباد
کوئی تبصرہ نہیں ہے۔
