چیف سیکرٹری پنجاب اور صوبائی وزیرِ تعلیم رانا سکندر حیات کی ہدایات کے تحت تعلیمی بورڈ راولپنڈی کے زیرِ اہتمام میٹرک امتحانات 2026 مکمل طور پر امتحانی شفافیت کے اصول کے مطابق جاری ہیں۔ کمانڈ اینڈ کنٹرول سینٹر سے امتحانی عمل کی آن لائن مانیٹرنگ نتیجہ خیز ثابت ہو رہی ہے اور موبائل ٹیمیں مختلف مراکز کے اچانک دورے کر کے نگرانی کو موثر بنا رہی ہیں۔زیرو ٹالرنس پالیسی کے تحت نقل کے خلاف سخت کارروائیاں جاری ہیں۔ کمشنر اور چیئرمین تعلیمی بورڈ انجینئر عامر خٹک کی خصوصی ہدایت پر نقل مافیا کے خاتمے کے لیے کریک ڈاؤن تیز کیا گیا ہے اور امتحانی عمل میں کسی بھی طرح کی خلاف ورزی کو برداشت نہیں کیا جائے گا۔کنٹرولر امتحانات تنویر اصغر اعوان نے متعدد امتحانی مراکز کا دورہ کیا جن میں گورنمنٹ ایسوسی ایٹ کالج برائے خواتین پولیس اسٹیشن روڈ صدر، گورنمنٹ گریجویٹ گورڈن کالج راولپنڈی، گورنمنٹ اسلامیہ ہائی سکول نمبر چار لیاقت علی روڈ راولپنڈی، گورنمنٹ گریجویٹ کالج اصغر مال سنٹر اے اور بی اور گورنمنٹ بوائز ہائی سکول سکھو شامل تھے۔ دوروں کے دوران انتظامی خامیوں کی نشاندہی کر کے فوری اصلاحی اقدامات کا حکم دیا گیا۔کنٹرولر امتحانات نے بتایا کہ گورنمنٹ ہائی سکول کانتریلہ راولپنڈی میں دو امیدوار نقل کرتے ہوئے رنگِ ہاتھوں پکڑے گئے جن کے خلاف فوری طور پر مقدمات درج کرائے گئے اور متعلقہ ڈسپلن برانچ کو کارروائی کے لیے مطلع کر دیا گیا ہے۔ امتحانی ایس او پیز پر مکمل عملدرآمد اور امیدواروں کے لیے صاف، شفاف اور منصفانہ امتحانی ماحول فراہم کرنا بورڈ کی اولین ترجیح ہے اور اس مقصد کے لیے تمام انتظامی و تکنیکی وسائل بروئے کار لائے جا رہے ہیں۔بورڈ کے ترجمان کا کہنا ہے کہ امتحانی شفافیت کو یقینی بنانے کی حکمتِ عملی مستقل رہے گی اور کسی بھی خلاف ورزی پر گرفتاری اور قانونی کارروائی سے گریز نہیں کیا جائے گا تاکہ طلبہ کا اعتماد بحال رہے اور نتائج مستند رہیں۔
وزیراعلیٰ پنجاب کے وژن پر امتحانی شفافیت یقینی
کوئی تبصرہ نہیں ہے۔
