اسلام آباد: پاکستان اسپورٹس بورڈ (پی ایس بی) کی پینشنرز ایکشن کمیٹی نے وفاقی دارالحکومت میں جاری سیاسی کشیدگی، امن و امان کی غیر یقینی صورتحال، راستوں کی ممکنہ بندش اور لاک آؤٹ کے خدشات پر گہری تشویش ظاہر کی ہے۔ کمیٹی کے مطابق ان حالات کے باعث 28 ستمبر 2026 کو عدالت میں مقرر پینشن کیس کی دوسری نہایت اہم سماعت متاثر یا مؤخر ہو سکتی ہے۔
پینشنرز ایکشن کمیٹی کا کہنا ہے کہ 250 سے زائد ریٹائرڈ ملازمین، بیواؤں اور یتیموں کے لیے یہ سماعت زندگی کی آخری امید کی حیثیت رکھتی ہے۔ کمیٹی کے مطابق جون 2026 سے ماہانہ پینشنز کی معطلی نے متاثرہ خاندانوں کو شدید مالی اور انسانی بحران سے دوچار کر رکھا ہے۔
کمیٹی نے بتایا کہ مالی مشکلات کے اثرات اب انسانی جانوں تک پہنچ چکے ہیں۔ ریٹائرڈ مالی عبدالقدیر دل کے دورے کے باعث انتقال کر چکے ہیں، جبکہ عبدالرحمٰن (نائب قاصد)، محمد کبیر ستی (سکیورٹی گارڈ) اور غلام رسول (ہیڈ ویٹر) سمیت متعدد معمر ریٹائرڈ ملازمین فالج اور دل کے شدید عوارض کے باعث اسپتالوں میں زیر علاج ہیں اور علاج کے لیے درکار مالی وسائل سے محروم ہیں۔
پینشنرز ایکشن کمیٹی نے وفاقی وزیر برائے بین الصوبائی رابطہ رانا ثنا اللہ خان، وزارت داخلہ اور مقامی انتظامیہ سے اپیل کی ہے کہ بزرگ شہریوں کے آئینی حقوق کو موجودہ سیاسی تعطل کی نذر نہ ہونے دیا جائے۔ کمیٹی نے مطالبہ کیا کہ عدالت تک بلا رکاوٹ رسائی یقینی بنائی جائے تاکہ 28 ستمبر کی سماعت کسی انتظامی یا صورتحال سے پیدا ہونے والی تاخیر کے بغیر منعقد ہو سکے۔
کمیٹی نے خبردار کیا کہ اگر شہر کی بندش یا راستوں کی رکاوٹوں کے باعث عدالتی کارروائی مزید مؤخر ہوئی تو ہنگامی عبوری ریلیف کا راستہ بھی رک جائے گا، جس سے فاقہ کش بیواؤں اور شدید بیمار ریٹائرڈ ملازمین کو ناقابل تلافی نقصان پہنچ سکتا ہے۔
