پاکستان اور روس نے تجارت، توانائی، زراعت اور تعلیم کے شعبوں میں تعاون مضبوط بنانے کے عزم کا اعادہ کیا ہے۔ یہ بات پاکستان روس: تجارت، تعلیم اور توانائی میں تعاون مضبوط بنانے کے موضوع پر منعقدہ ویب میں سامنے آئی۔
ویب میں دونوں ممالک کے اعلیٰ سرکاری حکام، سفارت کار، کاروباری رہنما، سائنس دان اور پبلک پالیسی ماہرین شریک ہوئے۔ شرکا نے دوطرفہ تعاون کو وسعت دینے اور معاشی روابط کے نئے مواقع پیدا کرنے کے عملی طریقوں پر گفتگو کی۔
اہم تقاریر سدار اویس احمد خان لغاری، روسی وزارت صنعت و تجارت کے نائب وزیر الیکسی گروزدیو، روس میں پاکستان کے سفیر فیصل نیاز ترمذی اور روسی وزارت خارجہ کے دوسرے ایشیا ڈپارٹمنٹ کے نائب ڈائریکٹر بورس برموسٹوف نے کیں۔
مقررین نے بہتر لاجسٹکس اور ٹرانسپورٹ روابط کے ذریعے دوطرفہ تجارت بڑھانے، کاروباری حلقوں کے درمیان رابطے مضبوط کرنے، توانائی کے شعبے میں تعاون وسعت دینے، ادائیگی کے پائیدار باہمی طریقہ کار بنانے، تعلیمی تبادلوں اور روسی زبان کے فروغ، اور طویل مدتی ادارہ جاتی شراکتیں قائم کرنے پر زور دیا۔
سفیر فیصل نیاز ترمذی نے تقریب سے خطاب کرتے ہوئے پاک روس تعلقات میں مثبت پیش رفت کا ذکر کیا اور تجارت کے فروغ، سرمایہ کاری کے حصول اور باہمی مفاد پر مبنی معاشی تعاون کی حمایت کے لیے پاکستان کے عزم کو دہرایا۔
انہوں نے انسانی روابط کی اہمیت پر زور دیتے ہوئے کہا کہ طلبہ کے تبادلے پائیدار اور طویل مدتی دوطرفہ تعلقات کی بنیاد ہیں۔
سفیر نے یہ بھی کہا کہ سیاحت اور تجارت آپس میں گہرا تعلق رکھتی ہیں، اس لیے ویزا طریقہ کار میں مزید آسانی سیاحت کے فروغ، کاروباری روابط کی مضبوطی اور معاشی تعاون کے نئے مواقع کھولنے میں مدد دے گی۔
اپنے خطاب کے اختتام پر سفیر ترمذی نے کہا کہ ماسکو میں پاکستان کا سفارت خانہ روسی حکومتی اداروں، کاروباری برادری، جامعات اور دیگر متعلقہ فریقوں کے ساتھ مل کر کام جاری رکھنے کے لیے پرعزم ہے تاکہ اقتصادی تعاون مزید گہرا ہو اور پاکستان اور روس کے درمیان بڑھتی ہوئی سیاسی ہم آہنگی کو دونوں ممالک کے عوام کے لیے ٹھوس تجارتی نتائج میں بدلا جا سکے۔
