نہم سالانہ امتحانات حکومت پنجاب کی زیرو ٹالرنس پالیسی کے تحت راولپنڈی بورڈ میں شفاف اور منظم انداز میں جاری ہیں۔ وزیراعلیٰ پنجاب مریم نواز شریف کے ویژن کے مطابق امتحانی نظام میں میرٹ اور شفافیت کو ہر صورت یقینی بنانے کے لیے متعلقہ محکموں نے سخت ہدایات جاری کی ہیں جن پر چیف سیکرٹری پنجاب زاہد زمان اور صوبائی وزیر تعلیم رانا سکندر حیات کے احکامات کے تحت عمل جاری ہے۔ کمشنر و چیئرمین تعلیمی بورڈ عامر خٹک کی نگرانی اور حکمت عملی نے امتحانی عمل کو موثر انداز میں سہارا دیا اور بوٹی مافیا کی کوششیں ناکام ثابت ہوئیں۔بورڈ آفس میں قائم کمانڈ اینڈ کنٹرول سینٹر کا دورہ ڈپٹی سیکرٹری ہائر ایجوکیشن ڈاکٹر صائمہ انور نے کنٹرولر امتحانات تنویر اصغر اعوان اور سیکرٹری تعلیمی بورڈ امجد اقبال خٹک کے ہمراہ کیا جہاں انہوں نے امتحانی مراکز کے انتظامات کا تفصیلی جائزہ لیا اور مجموعی کارکردگی پر اطمینان کا اظہار کیا۔ کنٹرول روم اور مقامِ امتحان پر سخت نگرانی کی جارہی ہے تاکہ کسی بھی بے ضابطگی کی صورت میں فوری کارروائی ممکن ہو سکے۔کنٹرولر امتحانات کے مطابق اس عمل کے دوران نو امیدوار نقل کرتے ہوئے پکڑے گئے جن میں گورنمنٹ ہائی سکول ہسولہ چکوال (مشترکہ) سے دو امیدوار، گورنمنٹ ہائی سکول بھکرال راولپنڈی (مشترکہ) سے ایک امیدوار، گورنمنٹ ہائی سکول ہرنال تحصیل گوجرخان راولپنڈی (مشترکہ) سے چار امیدوار اور گورنمنٹ ہائی سکول چکری راولپنڈی سے دو امیدوار شامل ہیں۔ ان تمام ملزمان کے خلاف مقدمات درج کر کے متعلقہ ڈسپلن برانچ کو ارسال کر دیا گیا ہے اور قانون کے مطابق کارروائی کی جا رہی ہے۔تعلیمی بورڈ کی ترجمان نے بتایا کہ امتحانی عمل کے دوران سخت مانیٹرنگ، مروجہ قواعد و ضوابط کی پابندی اور جدید کنٹرول میکانزم کی بدولت کسی بھی قسم کی بدعنوانی کی گنجائش نہیں رکھی جا رہی۔ نہم سالانہ امتحانات کے دوران طلبا کے مفادات اور میرٹ کے اصولوں کو برقرار رکھنے کے لیے مزید اقدامات کیے جا رہے ہیں تاکہ نتائج شفاف انداز میں جاری کیے جا سکیں اور تعلیمی معیار کا تحفظ ممکن بنایا جا سکے۔
نہم سالانہ امتحانات میں مکمل شفافیت یقینی
کوئی تبصرہ نہیں ہے۔
