اسلام آباد: انسٹی ٹیوٹ آف اسٹریٹجک اسٹڈیز اسلام آباد (آئی ایس ایس آئی) میں پاکستان کے 79ویں یومِ آزادی کے موقع پر ایک خصوصی تقریب منعقد کی گئی، جس میں بانیانِ پاکستان کے وژن، قیادت اور حوصلے کو خراجِ عقیدت پیش کیا گیا۔ تقریب کا مقصد ملک کی تابناک تاریخ، قومی جذبے اور غیر متزلزل عزم کو اجاگر کرنا تھا۔
پروگرام میں ادارے کی سینئر مینجمنٹ، ریسرچ فیکلٹی، اسٹاف اور انٹرنز نے شرکت کی۔ تقریب کا نمایاں حصہ آئی ایس ایس آئی کے ریسرچ انٹرنز کی جانب سے تیار کردہ خصوصی پروگرام تھا، جس میں مختصر دستاویزی فلموں کے ذریعے پاکستان کی تاریخ، آزاد وطن کے حصول کے لیے بزرگوں کی جدوجہد اور قربانیوں، اور مختلف مذاہب، قومیتوں اور زبانوں سے مزین ثقافتی تنوع کو پیش کیا گیا۔
ان دستاویزی پیشکشوں میں پاکستانی عوام کی حب الوطنی، استقامت، مہمان نوازی اور تعمیرِ وطن کے عزم کی بھرپور عکاسی کی گئی۔
تقریب سے خطاب کرتے ہوئے آئی ایس ایس آئی کے ڈائریکٹر جنرل، سفیر معین الحق نے پاکستان کے شاندار سفر پر روشنی ڈالی اور گزشتہ سات دہائیوں کے دوران ملک کی کامیابیوں کا ذکر کیا۔ انہوں نے کہا کہ پاکستان ایک بابرکت ملک ہے اور اس کی اصل طاقت اس کے عوام میں ہے۔ انہوں نے زور دیا کہ قوم سازی کے لیے نظم و ضبط، احساسِ ذمہ داری، دیانت داری اور اصول پسندی کے ساتھ ذاتی اور پیشہ ورانہ ترقی کے لیے کوشش کرنا ضروری ہے۔
ڈائریکٹر ایڈمنسٹریشن ڈاکٹر طلعت شبیر نے کہا کہ قائداعظم کے اصول ’’اتحاد، ایمان اور نظم‘‘ پاکستان کی قومی شناخت کا بنیادی حصہ ہیں۔ انہوں نے نوجوانوں پر زور دیا کہ وہ ان اصولوں پر غور کریں، انہیں اپنائیں اور ایک مضبوط، خوشحال اور پائیدار پاکستان کی تعمیر کے لیے اجتماعی طور پر کام کریں۔
اس موقع پر آئی ایس ایس آئی میں دو دہائیوں سے زائد خدمات انجام دینے والے اسٹاف ارکان کو بھی ان کی طویل وابستگی، قابل قدر خدمات اور ادارے کے لیے عزم کے اعتراف میں اعزازات دیے گئے۔
تقریب کا اختتام خصوصی کیک کاٹنے کی رسم کے ساتھ ہوا۔
