اسلام آباد: اسلامی جمہوریہ ایران کے سفارتخانے اسلام آباد اور مقیم سفارتی کور نے کوئٹہ، بلوچستان میں پیش آنے والے المناک کان حادثے پر حکومتِ پاکستان اور پاکستانی عوام سے گہرے دکھ اور دلی تعزیت کا اظہار کیا ہے۔
بیان میں کہا گیا کہ اس دل خراش واقعے کی خبر نہایت افسوس کے ساتھ موصول ہوئی، جس میں 32 کان کن جان کی بازی ہار گئے۔ یہ کان کن اپنے اہلِ خانہ کی کفالت کے لیے محنت اور مشقت سے کام کر رہے تھے۔
ایرانی سفارتخانے اور سفارتی کور نے حکومتِ پاکستان، عوامِ پاکستان اور خاص طور پر سوگوار خاندانوں کے ساتھ ہمدردی کا اظہار کیا جنہوں نے اپنے پیاروں کو کھو دیا۔
بیان کے مطابق اس مشکل گھڑی میں متاثرہ افراد کے ساتھ خیالات اور دعائیں ہیں۔ زخمیوں کی جلد اور مکمل صحت یابی کے لیے دعا کی گئی، جبکہ لاپتا افراد کی بحفاظت بازیابی اور تلاش کے لیے بھی نیک خواہشات کا اظہار کیا گیا۔
بیان میں دعا کی گئی کہ اللہ تعالیٰ جاں بحق ہونے والوں کو جوارِ رحمت میں جگہ عطا فرمائے، ان کے اہلِ خانہ کو صبر و ہمت دے، اور اس المناک نقصان پر غم زدہ تمام افراد کو حوصلہ عطا کرے۔
