اسلام آباد: ڈسٹرکٹ ہیلتھ آفیسر اسلام آباد نے بریسٹ کینسر آگاہی سیشن سے خطاب کرتے ہوئے کہا ہے کہ خواتین میں چھاتی کے سرطان سے متعلق شعور اجاگر کرنا وقت کی اہم ضرورت ہے۔
انہوں نے کہا کہ چھاتی کے سرطان کی بروقت تشخیص، باقاعدہ اسکریننگ اور بروقت علاج بیماری کی پیچیدگیوں میں کمی اور بہتر طبی نتائج کے لیے نہایت اہم کردار ادا کرتے ہیں۔ ان کے مطابق خواتین کو اس مرض کی علامات، ابتدائی تشخیص اور صحت کے حوالے سے بروقت طبی مشورہ حاصل کرنے کی اہمیت سے آگاہ کرنا ضروری ہے۔
ڈسٹرکٹ ہیلتھ آفیسر اسلام آباد نے زور دیا کہ خواتین اپنی صحت کو ترجیح دیں اور کسی بھی مشتبہ علامت کی صورت میں طبی معائنہ کروائیں۔ انہوں نے کہا کہ مستند طبی ماہرین سے رہنمائی حاصل کرنا بیماری کی بروقت نشاندہی اور علاج کے لیے اہم ہے۔
یہ آگاہی سیشن اکتوبر میں منائے جانے والے بریسٹ کینسر آگاہی مہینے پنکٹوبر (Pinktober) کے سلسلے میں منعقد کیا گیا۔ سیشن کا مقصد چھاتی کے سرطان کے بارے میں شعور بیدار کرنا اور خواتین کو بروقت تشخیص و علاج کی اہمیت سے آگاہ کرنا تھا۔
