راولپنڈی: معروف ماہرِ تعلیم اور راولپنڈی پبلک اسکول کی پرنسپل عذرا طارق نے عیدالفطر کے موقع پر اپنے پیغام میں دنیا بھر کے مسلمانوں کو مبارکباد پیش کرتے ہوئے کہا ہے کہ یہ بابرکت دن امتِ مسلمہ کے لیے امن، خوشحالی اور اتحاد کا پیغام لے کر آئے۔
اپنے پیغام میں انہوں نے کہا کہ عیدالفطر محض خوشی کا تہوار نہیں بلکہ یہ ہمدردی، ایثار اور بھائی چارے کو فروغ دینے کا اہم موقع بھی ہے۔ انہوں نے عوام پر زور دیا کہ وہ اپنی خوشیوں میں مستحق افراد کو بھی شامل کریں اور معاشرتی ہم آہنگی کو مضبوط بنائیں۔
عذرا طارق نے دعا کی کہ اللہ تعالیٰ ہماری عبادات کو قبول فرمائے، ہمیں ایک دوسرے کا سہارا بننے کی توفیق عطا کرے اور ہمیں راہِ راست پر قائم رکھے۔ انہوں نے مزید کہا کہ اللہ تعالیٰ پاکستان پر اپنی بے شمار رحمتیں نازل فرمائے اور ملک کو ترقی و استحکام عطا کرے۔ آمین۔
انہوں نے اس بات پر بھی زور دیا کہ عید کے موقع پر ہمیں اپنے اردگرد موجود ضرورت مند افراد، یتیموں اور محروم طبقات کا خاص خیال رکھنا چاہیے تاکہ حقیقی معنوں میں عید کی خوشیاں سب تک پہنچ سکیں۔ ان کا کہنا تھا کہ اجتماعی خوشی ہی معاشرتی استحکام کی بنیاد بنتی ہے۔
مزید برآں انہوں نے طلبہ اور نوجوان نسل کو مخاطب کرتے ہوئے کہا کہ وہ عید کی خوشیوں کے ساتھ ساتھ اپنی ذمہ داریوں کو بھی یاد رکھیں اور تعلیم، کردار سازی اور مثبت سوچ کے ذریعے ملک کی ترقی میں اپنا کردار ادا کریں۔ انہوں نے کہا کہ ایک باشعور اور تعلیم یافتہ نوجوان ہی پاکستان کے روشن مستقبل کی ضمانت ہے۔
