سابق وزیرِ اعظم راجہ پرویز اشرف کی فارن میڈیکل گریجویٹس (FMGs) سے اظہارِ یکجہتی — ڈاکٹر رافع شیر سے ملاقات میں حمایت کا اعلان
اسلام آباد— سابق وزیرِ اعظم اور سابق اسپیکر قومی اسمبلی راجہ پرویز اشرف نے فارن میڈیکل گریجویٹس (FMGs) کے مسائل کے حل کے لیے جاری کوششوں کی مکمل حمایت کا اعلان کیا ہے۔ یہ اعلان اُن کی ڈاکٹر رافع شیر سے ہونے والی ایک تفصیلی ملاقات کے دوران کیا گیا، جس میں موجودہ پاکستان میڈیکل اینڈ ڈینٹل کونسل (PMDC) پالیسیوں کے تحت فارن گریجویٹس کو درپیش چیلنجز پر تفصیلی تبادلۂ خیال کیا گیا۔
راجہ پرویز اشرف نے کہا کہ پاکستان پیپلز پارٹی (PPP) ہمیشہ پاکستان کے نوجوانوں کے ساتھ کھڑی رہی ہے اور اُن رکاوٹوں کو دور کرنے کے لیے کوشاں ہے جو اُن کی ترقی کی راہ میں حائل ہیں۔ اُنہوں نے اس عزم کا اعادہ کیا کہ پیپلز پارٹی انصاف، مساوی مواقع اور میرٹ پر مبنی پالیسیوں کے فروغ کے لیے اپنی آواز بلند رکھے گی تاکہ بیرونِ ملک سے تعلیم یافتہ پاکستانی ڈاکٹرز اپنے وطن کے صحت کے نظام میں مؤثر کردار ادا کر سکیں۔
ڈاکٹر رافع شیر نے راجہ پرویز اشرف کی مستقل حمایت اور مسئلے کی گہری سمجھ بوجھ پر اُن کا شکریہ ادا کیا۔ اُنہوں نے کہا کہ سابق وزیرِ اعظم کا مثبت اور تعمیری کردار اس بات کا ثبوت ہے کہ وہ فارن میڈیکل گریجویٹس کے جائزمطالبات کو اعلیٰ سطح پر اجاگر کرنے کے لیے سنجیدگی سے کوشاں ہیں۔
ڈاکٹر رافع شیر نے مزید کہا کہ پاکستان پیپلز پارٹی فارن میڈیکل گریجویٹس کی سب سے مضبوط سیاسی حامی جماعت کے طور پر سامنے آئی ہے۔ اُنہوں نے کہا کہ "پیپلز پارٹی ہمیشہ عوامی جماعت رہی ہے اور ایک بار پھر اس نے تعلیم یافتہ نوجوانوں کے ساتھ کھڑے ہو کر اپنی عوام دوستی کو ثابت کیا ہے۔ راجہ پرویز اشرف کی کاوشیں قابلِ تحسین ہیں۔”
انہوں نے زور دیا کہ پالیسی سازوں اور فارن میڈیکل گریجویٹس کے نمائندوں کے درمیان مسلسل مکالمہ اور تعاون ہی اس مسئلے کے شفاف اور منصفانہ حل کی بنیاد رکھ سکتا ہے، تاکہ بیرونِ ملک تعلیم یافتہ پاکستانی ڈاکٹرز اپنے وطن کے صحت کے نظام کو مضبوط بنانے میں مؤثر کردار ادا کر سکیں۔
