جنیوا میں پاکستان نے اقوام متحدہ کی کمیٹی برائے اقتصادی، سماجی و ثقافتی حقوق کے سامنے اپنا دوسرا دورانی جائزہ مکمل کر لیا۔ وزارتِ انسانی حقوق، حکومتِ پاکستان کے مطابق وزیر مملکت برائے قانون و انصاف بیرسٹر عقیل ملک نے جائزہ اجلاس میں پاکستانی وفد کی قیادت کی۔
پاکستانی وفد میں وفاقی سیکریٹری برائے انسانی حقوق عبد الخالق شیخ، ڈائریکٹر بین الاقوامی تعاون ڈاکٹر محمد عارف اور ٹرانسجینڈر رائٹس ایکسپرٹ محترمہ نایاب علی بھی شامل تھے۔
اجلاس کے دوران پاکستان نے اپنی بین الاقوامی انسانی حقوق ذمہ داریوں پر عمل درآمد کے سلسلے میں قانون سازی، پالیسی اور ادارہ جاتی سطح پر ہونے والی پیش رفت سے کمیٹی کو آگاہ کیا۔ وفد نے تعلیم، صحت، سماجی تحفظ، مزدوروں کے حقوق اور خواتین کو بااختیار بنانے سے متعلق اقدامات کو بھی اجاگر کیا۔
پاکستانی وفد نے بچوں کے تحفظ کو مضبوط بنانے، کم عمری کی شادیوں کی روک تھام اور صنفی بنیاد پر تشدد سے نمٹنے کے لیے کیے گئے اقدامات کی تفصیلات بھی پیش کیں۔ وزارتِ انسانی حقوق نے وفاقی اور صوبائی شراکت داروں کی مشاورت سے پاکستان کی دورانی رپورٹنگ کے عمل کو مربوط کیا۔
اقوام متحدہ کی کمیٹی کے اراکین کی جانب سے اٹھائے گئے سوالات اور مشاہدات کے جواب میں پاکستانی وفد نے تفصیلی مؤقف پیش کیا۔ پاکستان نے اقوام متحدہ کے انسانی حقوق کے میکانزم کے ساتھ تعمیری روابط جاری رکھنے کے عزم کا اعادہ کیا۔
وزیر مملکت بیرسٹر عقیل ملک نے کہا کہ انسانی حقوق سے متعلق وعدوں پر مؤثر عمل درآمد کے لیے مستقل ادارہ جاتی رابطہ اور ہم آہنگی ضروری ہے۔ پاکستان نے کمزور طبقات کے تحفظ اور اقتصادی، سماجی و ثقافتی حقوق کے فروغ کے لیے اپنے عزم کا اعادہ کیا۔
پاکستان نے یہ بھی واضح کیا کہ کمیٹی کی آئندہ سفارشات کا وفاقی اور صوبائی سطح پر مسلسل رابطہ کاری کے ذریعے جائزہ لیا جائے گا۔
