اسلام آباد: پیر مہر علی شاہ بارانی زرعی یونیورسٹی راولپنڈی اور مالدیپ نیشنل یونیورسٹی کے درمیان ہائر ایجوکیشن کمیشن اسلام آباد میں مفاہمتی یادداشت پر دستخط کیے گئے، جس کا مقصد تعلیمی تعاون کو وسعت دینا، زرعی تعلیم کو فروغ دینا اور پاکستان و مالدیپ کے ادارہ جاتی روابط کو مزید مضبوط بنانا ہے۔
مفاہمتی یادداشت پر بارانی زرعی یونیورسٹی کے وائس چانسلر پروفیسر ڈاکٹر قمرالزمان اور مالدیپ نیشنل یونیورسٹی کی وائس چانسلر ڈاکٹر عائشہ شہناز آدم نے دستخط کیے۔ اس موقع پر چیئرمین ہائر ایجوکیشن کمیشن پروفیسر ڈاکٹر نیاز احمد اختر، ستارۂ امتیاز، بھی موجود تھے۔
معاہدے کے تحت زراعت اور اس سے متعلقہ شعبوں میں نصاب کی تیاری و بہتری، فیکلٹی کی استعداد کار میں اضافہ، علمی تبادلے اور سائنسی تعاون کو فروغ دیا جائے گا۔ دونوں اداروں کے درمیان یہ تعاون زرعی تعلیم اور تحقیق کے شعبوں میں مشترکہ پیش رفت کے لیے اہم قرار دیا جا رہا ہے۔
تقریب سے گفتگو کرتے ہوئے پروفیسر ڈاکٹر قمرالزمان نے کہا کہ یہ مفاہمتی یادداشت بین الاقوامی تعلیمی تعاون کو مضبوط بنانے اور معیاری تعلیم، تحقیق اور جدت کو آگے بڑھانے کی جانب اہم قدم ہے۔ ان کا کہنا تھا کہ مالدیپ نیشنل یونیورسٹی کے ساتھ اشتراک سے علم کے تبادلے، اساتذہ کی پیشہ ورانہ ترقی اور مشترکہ تعلیمی سرگرمیوں کو تقویت ملے گی۔
مالدیپ نیشنل یونیورسٹی کی وائس چانسلر ڈاکٹر عائشہ شہناز آدم نے شراکت داری کو تعلیمی مہارتوں میں اضافے، ادارہ جاتی صلاحیت کے فروغ اور زرعی تعلیم و ترقی کو درپیش ابھرتے ہوئے چیلنجز سے نمٹنے کے لیے علم کے تبادلے کا مؤثر ذریعہ قرار دیا۔
پیر مہر علی شاہ بارانی زرعی یونیورسٹی کے ڈین ایگریکلچر اور مالدیپ تعاون کے فوکل پرسن پروفیسر ڈاکٹر اعظم خاں نے دونوں جامعات کے درمیان روابط کو آگے بڑھانے اور اس شراکت داری کو ممکن بنانے میں کلیدی کردار ادا کیا۔
