لاہور: جناح پولو فیلڈز میں بدھ کے روز جے پی ایف پنک پولو کپ 2026 کے مقابلوں میں دلچسپ اور جارحانہ پولو دیکھنے کو ملی، جہاں دن/ایف جی نے ماسٹر پینٹس/نیوایج کو 10-4 سے شکست دے کر مین فائنل کے لیے کوالیفائی کر لیا، جبکہ ایف جی/دن نے اوکھانو کو 10-8.5 سے ہرا کر ٹورنامنٹ میں اپنی پوزیشن مزید مضبوط کر دی۔
پہلے میچ میں دن/ایف جی نے شاندار کھیل پیش کرتے ہوئے ماسٹر پینٹس/نیوایج کے خلاف واضح برتری حاصل کی۔ فاتح ٹیم کی جانب سے عباس مختار نے پانچ گول اسکور کر کے نمایاں کردار ادا کیا، جبکہ کیان ہال نے چار گول بنائے۔ ایس ایم رفعے نے ایک گول کا اضافہ کیا اور یوں دن/ایف جی کا مجموعہ 10 گول تک پہنچا۔
ماسٹر پینٹس/نیوایج کی جانب سے المان جلیل اعظم نے دو گول کیے، جبکہ ماہنم فیصل اور امیر رضا بہبودی نے ایک ایک گول اسکور کیا۔ تاہم ان کی مجموعی چار گول کی کوشش دن/ایف جی کی مضبوط کارکردگی کے سامنے ناکافی ثابت ہوئی۔
دوسرے مقابلے میں ایف جی/دن اور اوکھانو کے درمیان سخت مقابلہ ہوا، جس میں ایف جی/دن نے 10-8.5 سے کامیابی حاصل کی۔ اس میچ کی خاص بات کیان ہال کی غیر معمولی کارکردگی تھی، جنہوں نے فاتح ٹیم کے تمام 10 گول خود اسکور کیے۔ انہوں نے پنالٹی مواقع سے بھی فائدہ اٹھایا اور دور سے گول کر کے ایف جی/دن کو برتری دلائے رکھی۔
اوکھانو نے جواب میں چھ فیلڈ گول اسکور کیے۔ بمتو نے عمدہ کھیل پیش کرتے ہوئے پانچ گول بنائے، جبکہ صائم عباس نے ایک گول کیا۔ اوکھانو کو 2.5 گول کے ہینڈی کیپ کا بھی فائدہ حاصل تھا، جس کے بعد اس کا مجموعی اسکور 8.5 بنا۔ تاہم ایف جی/دن کے 10 گول فیصلہ کن ثابت ہوئے اور ٹیم نے 1.5 گول کے فرق سے کامیابی سمیٹ لی۔
