لاہور: پاکستان پیپلز پارٹی وسطی پنجاب کی قیادت نے میاں نعمان حسین قریشی کو پیپلز پارٹی لاہور ڈویژن اربن کا نائب صدر مقرر کر دیا ہے۔
اس سلسلے میں منگل کو جاری ہونے والے سرکاری نوٹیفکیشن، ریفرنس نمبر 7778-CPS-26، کے مطابق یہ تقرری فوری طور پر نافذ العمل ہو گی۔ نوٹیفکیشن کے مطابق میاں نعمان حسین قریشی کی تقرری کی منظوری پیپلز پارٹی وسطی پنجاب کے صدر راجہ پرویز اشرف نے دی جبکہ اسے جنرل سیکرٹری سید حسن مرتضیٰ کے دستخط سے باضابطہ طور پر جاری کیا گیا۔
پارٹی نوٹیفکیشن میں واضح کیا گیا ہے کہ یہ ذمہ داری فوری اثر کے ساتھ دی گئی ہے اور آئندہ احکامات تک برقرار رہے گی۔ ہدایت نامے کی سرکاری نقول ریکارڈ اور پارٹی نوٹیفکیشن کے طریقہ کار کے لیے چیئرمین سیکرٹریٹ بلاول ہاؤس کراچی، پیپلز پارٹی کے سیکرٹری جنرل اسلام آباد اور زرداری ہاؤس کو بھی ارسال کر دی گئی ہیں۔
