اسلام آباد، 7 جولائی 2026: ہائر ایجوکیشن کمیشن (ایچ ای سی) پاکستان نے چین کی ووہان ٹیکسٹائل یونیورسٹی (WTU) کے اسکول آف بایومیڈیکل انجینئرنگ کے اعلیٰ سطحی وفد کا خیرمقدم کیا۔ اس ملاقات کا مقصد اعلیٰ تعلیم، تحقیق، جدت اور باہمی تعاون کو مزید فروغ دینا تھا۔
اجلاس کی صدارت ایگزیکٹو ڈائریکٹر ایچ ای سی ڈاکٹر ضیاء الحق نے کی۔ اجلاس میں ایچ ای سی کے سینئر افسران، نیشنل یونیورسٹی آف ٹیکنالوجی (NUTECH)، پاکستان سائنس فاؤنڈیشن (PSF)، وزارت سائنس و ٹیکنالوجی اور دیگر متعلقہ اداروں کے نمائندوں نے شرکت کی۔
اجلاس سے خطاب کرتے ہوئے ڈاکٹر ضیاء الحق نے کہا کہ ایچ ای سی بین الاقوامی جامعات کے ساتھ اسٹریٹجک شراکت داری کو فروغ دینے کے لیے پرعزم ہے تاکہ تعلیمی معیار، تحقیق، ادارہ جاتی استعداد اور علم کے تبادلے کو مزید مستحکم کیا جا سکے۔ انہوں نے پاکستان اور چین کے درمیان اعلیٰ تعلیمی اداروں کے باہمی تعاون کو دونوں ممالک کی مشترکہ ترجیحات کے مطابق انتہائی اہم قرار دیا۔
ووہان ٹیکسٹائل یونیورسٹی کے وفد نے اپنی جامعہ کے تعلیمی اور تحقیقی شعبوں کا تعارف پیش کرتے ہوئے ٹیکسٹائل و فائبر ٹیکنالوجی، سینسر ٹیکنالوجی اور جینیٹک انجینئرنگ میں اپنی مہارت سے آگاہ کیا۔ وفد نے نیشنل یونیورسٹی آف ٹیکنالوجی (NUTECH) اور انسٹی ٹیوٹ آف اسپیس ٹیکنالوجی (IST) کے ساتھ جاری تعاون کا بھی ذکر کیا اور پاکستان کی مزید جامعات کے ساتھ روابط بڑھانے میں دلچسپی کا اظہار کیا۔
ملاقات کے دوران مشترکہ تحقیقی منصوبوں، اساتذہ اور طلبہ کے تبادلے، پوسٹ گریجویٹ طلبہ کی مشترکہ نگرانی، سینڈوچ پروگرامز اور انڈرگریجویٹ سطح پر تعلیمی تعاون سمیت مختلف شعبوں پر تفصیلی غور کیا گیا۔
چینی وفد نے اس بات پر زور دیا کہ چین میں انڈرگریجویٹ تعلیم حاصل کرنے کے خواہشمند پاکستانی طلبہ کے لیے چینی زبان پر عبور نہایت اہم ہے۔ اس مقصد کے لیے پاکستانی جامعات میں چینی زبان کے پروگراموں کو فروغ دینے کی تجویز دی گئی تاکہ طلبہ کو چین میں اعلیٰ تعلیم اور روزگار کے بہتر مواقع میسر آ سکیں۔
وفد نے بیلٹ اینڈ روڈ انیشی ایٹو (BRI) کے تحت ایچ ای سی کے ساتھ مشترکہ تعلیمی کانفرنسوں، نصاب کی تیاری اور پاکستانی جامعات میں ٹیکسٹائل و فائبر ٹیکنالوجی کے فروغ کے لیے تعاون کی پیشکش بھی کی۔
تفصیلی مشاورت کے بعد دونوں فریقوں نے کئی اہم شعبوں میں تعاون بڑھانے پر اتفاق کیا۔ ایچ ای سی ایسی پاکستانی جامعات کی نشاندہی کرے گا جو ووہان ٹیکسٹائل یونیورسٹی کے ساتھ انڈرگریجویٹ سطح پر تعلیمی تعاون شروع کرنے میں دلچسپی رکھتی ہوں، جس کے بعد باقاعدہ مفاہمتی یادداشتوں (MoUs) پر دستخط کیے جائیں گے۔ اس کے علاوہ اساتذہ کے تبادلے کے پروگراموں پر بھی غور کیا جائے گا تاکہ مشترکہ تحقیق اور علمی روابط کو مزید فروغ دیا جا سکے۔
اجلاس میں پاکستانی جامعات میں چینی زبان کے پروگراموں کے فروغ کے لیے نیشنل یونیورسٹی آف ماڈرن لینگویجز (NUML) کے ساتھ ممکنہ تعاون پر بھی تبادلہ خیال کیا گیا۔ مزید برآں، ووہان ٹیکسٹائل یونیورسٹی کے اشتراک سے جامعات کے ٹیکنیکل اسٹاف کے لیے مختصر مدت کے سرٹیفکیٹ اور تکنیکی تربیتی پروگرام متعارف کرانے پر بھی اتفاق کیا گیا تاکہ ادارہ جاتی استعداد میں اضافہ ہو سکے۔
اجلاس کے اختتام پر معزز چینی وفد کا شکریہ ادا کیا گیا اور پاکستان اور چین کے درمیان اعلیٰ تعلیم، تحقیق اور جدت کے شعبوں میں ادارہ جاتی تعاون کو مزید مضبوط بنانے کے عزم کا اعادہ کیا گیا۔
