پٹرولیم مصنوعات کی قیمتوں میں کمی کے بعد راولپنڈی میں ٹرانسپورٹ کرایوں میں کمی کا فیصلہ نافذ کر دیا گیا ہے، جس کے تحت پبلک ٹرانسپورٹ کے کرایوں میں بارہ سے اٹھارہ فیصد تک کمی کی گئی ہے۔ ضلعی انتظامیہ اور سیکریٹری ریجنل ٹرانسپورٹ اتھارٹی کی جانب سے عوامی سہولت کے لیے نئے کرائے نامے جاری کیے گئے ہیں تاکہ مسافروں کو فوری ریلیف مل سکے۔سیکریٹری آر ٹی اے کے مطابق کرایوں میں کمی پٹرولیم مصنوعات کی قیمتوں میں ہونے والی کمی کے تناسب سے کی گئی ہے۔ تحصیل سطح پر جاری کیے گئے نئے کرائے ناموں میں مختلف اقسام کی ٹرانسپورٹ کے لیے الگ الگ شرح مقرر کی گئی ہے۔ ائیر کنڈیشنڈ ڈیزل ٹرانسپورٹ کے کرایوں میں بارہ فیصد، نان ائیر کنڈیشنڈ ڈیزل ٹرانسپورٹ اور پٹرول پبلک ٹرانسپورٹ کے کرایوں میں پندرہ فیصد جبکہ مال بردار گاڑیوں کے کرایوں میں اٹھارہ فیصد کمی کی گئی ہے۔انتظامیہ کے مطابق ٹرانسپورٹ کرایوں میں کمی کے فیصلے کا مقصد عام مسافروں اور تاجروں پر مالی دباؤ کم کرنا ہے۔ راولپنڈی کے مختلف روٹس پر چلنے والی بسوں، ویگنوں اور دیگر پبلک ٹرانسپورٹ ذرائع کے لیے نئے نرخ نمایاں طور پر آویزاں کیے جا رہے ہیں تاکہ کوئی مسافر مقررہ کرائے سے زائد ادائیگی نہ کرے۔ضلعی انتظامیہ نے اوور چارجنگ کے خلاف بھی سخت رویہ اختیار کیا ہے۔ بس اڈوں اور اہم روٹس پر چیکنگ کے لیے ٹیمیں متحرک کر دی گئی ہیں جو کرایوں کی پابندی کا جائزہ لے رہی ہیں۔ حکام کا کہنا ہے کہ مقررہ کرائے سے زیادہ وصولی کرنے والوں کے خلاف قانونی کارروائی کی جائے گی اور اس حوالے سے کسی قسم کی نرمی نہیں برتی جائے گی۔شہریوں کو ہدایت کی گئی ہے کہ وہ سفر کے دوران کرایہ نامہ دیکھ کر ہی ادائیگی کریں اور زائد وصولی کی صورت میں متعلقہ حکام کو اطلاع دیں۔ انتظامیہ کے مطابق نئے اقدامات پر عمل درآمد سے نہ صرف مسافروں کو سہولت ملے گی بلکہ ٹرانسپورٹ نظام میں شفافیت بھی بہتر ہوگی۔
راولپنڈی میں ٹرانسپورٹ کرایوں میں نمایاں کمی
کوئی تبصرہ نہیں ہے۔
