پاکستان اسپورٹس بورڈ نے اپریل کے مہینے کی پینشن کی ادائیگی کے احکامات جاری کر دیے ہیں، جس کے نتیجے میں ریٹائرڈ ملازمین کے اہل خانہ عید الاضحیٰ کے موقع پر مالی سکون محسوس کر رہے ہیں۔ پینشن کی ادائیگی میں تاخیر کے باعث پینشنرز کی نمائندہ کمیٹی نے مسئلے کے حل کے لیے اقدامات کیے۔پینشنرز کے ایک وفد نے سابق ڈی جی پاکستان اسپورٹس بورڈ یاسر پیرزادہ سے ۷ مئی کو ملاقات کی مگر مسئلہ اس ملاقات میں حل نہ ہو سکا۔ بعد ازاں ۱۱ مئی ۲۰۲۶ کو نوٹیفیکیشن کے ذریعے سابق ڈی جی کو متعلقہ محکمہ بھیجا گیا اور اضافی چارج وفاقی سیکرٹری وزارتِ آئی پی سی کو سونپ دیا گیا، جس کے بعد صورتحال میں تیزی آئی۔۲۰ مئی ۲۰۲۶ کو پینشنرز کے وفد، جس میں بورڈ کے سابق سینئر افسران بھی شامل تھے، نے وفاقی سیکرٹری اور قائم مقام ڈی جی سے تحریری درخواست پیش کی اور اپریل کی پینشن کی ادائیگی کے فوری اقدام کا مطالبہ کیا۔ وزارت نے بتایا کہ اپریل کی پینشن وقت پر ادا نہ ہونے کی وجہ تکنیکی نوعیت کی مشکلات تھیں، تاہم چارج سنبھالنے کے بعد متعلقہ حکام مسلسل کوششوں میں مصروف رہے۔ذاتی سطح پر ذمہ دار افراد سے رابطے کیے گئے اور وفد کو یقین دہانی کروائی گئی کہ ممکنہ حد تک کوشش کی جائے گی کہ پینشن کی ادائیگی عید سے قبل ہو جائے۔ وفاقی سیکرٹری محی الدین وانی صاحب کی مسلسل نگرانی اور متعلقہ اسٹاف کی کوششوں کے باعث بالآخر ادائیگی کے احکامات جاری کر دیے گئے، جس سے بیواؤں، یتیموں اور ریٹائرڈ اہل خانہ کو فوری ریلیف ملا۔وفد نے وفاقی سیکرٹری کی نیک نیتی اور جلد از جلد مسئلہ حل کرنے کی کوششوں کو سراہا اور ان کے لیے صحت و تندرستی اور طویل عمر کی دعا کی گئی۔ پینشن کی ادائیگی کے اس فیصلے سے متعلق اہل خانہ میں اطمینان کی لہر دوڑ گئی ہے اور حکومت کے رویے کو ایک مثبت قدم قرار دیا جا رہا ہے۔
پاکستان اسپورٹس بورڈ نے اپریل پینشن جاری کر دی
کوئی تبصرہ نہیں ہے۔
