ڈاکٹر ندیم احمد ملک سمیت پیر مہر علی شاہ زرعی یونیورسٹی کے دو ڈائریکٹرز عمرہ کی ادائیگی کے لیے روانہ
راولپنڈی: پیر مہر علی شاہ زرعی یونیورسٹی راولپنڈی میں ایک پروقار تقریب کا انعقاد کیا گیا جس میں عمرہ کی سعادت حاصل کرنے کے لیے سعودی عرب روانہ ہونے والے دو سینئر افسران کو الوداع کیا گیا۔
تقریب کی قیادت وائس چانسلر پروفیسر ڈاکٹر قمر الزمان نے کی۔ اس موقع پر ڈائریکٹر آئی ٹی سروسز ڈاکٹر ندیم احمد ملک اور ڈائریکٹر پروکیورمنٹ ڈاکٹر وارث علی کو رخصت کیا گیا۔ تقریب میں رجسٹرار، مختلف فیکلٹیز کے ڈینز، ڈائریکٹرز اور اساتذہ نے شرکت کی۔
وائس چانسلر نے دونوں افسران کو عمرہ کی سعادت حاصل کرنے پر مبارکباد دی اور ان کے محفوظ سفر اور عبادات کی قبولیت کے لیے نیک تمناؤں کا اظہار کیا۔ اس موقع پر انہیں ہار پہنائے گئے اور نیک خواہشات کا اظہار کیا گیا۔
پروفیسر ڈاکٹر قمر الزمان نے روانگی سے قبل درخواست کی کہ وہ حرمین شریفین میں یونیورسٹی اور ملک کی ترقی، استحکام اور خوشحالی کے لیے خصوصی دعائیں کریں۔ یونیورسٹی برادری نے بھی ان کی خیریت سے واپسی کے لیے دعا کی۔
