اسلام آباد: سینیٹ کے چیئرمین سید یوسف رضا گیلانی نے ایوانِ بالا میں ’’اقلیتی کاکس‘‘ کے قیام کا اعلان کیا ہے، جس کا مقصد ملک بھر میں اقلیتوں کے آئینی و قانونی حقوق کے تحفظ اور ان کی فلاح و بہبود کو یقینی بنانا ہے۔ اس حوالے سے باضابطہ نوٹیفکیشن بھی جاری کر دیا گیا ہے، اور اس کاکس میں قومی اسمبلی کے ارکان کی نمائندگی بھی شامل ہوگی، جنہیں اسپیکر قومی اسمبلی نامزد کریں گے۔
چیئرمین سینیٹ اور اسپیکر قومی اسمبلی کے درمیان باہمی مشاورت کے بعد اس کاکس کے قیام کا فیصلہ کیا گیا۔ یوسف رضا گیلانی نے کہا کہ اقلیتی کاکس کے قیام کا مطالبہ سینیٹ میں موجود اقلیتی ارکان کی جانب سے کیا گیا تھا، جس کے تحت اب ان کے مسائل کو ترجیحی بنیادوں پر حل کیا جائے گا۔
اس کاکس کا بنیادی مقصد اقلیتوں کے حقوق کا تحفظ، متعلقہ قوانین پر مؤثر عملدرآمد اور بین المذاہب ہم آہنگی کو فروغ دینا ہے۔ اس کے قیام سے برداشت، تنوع اور باہمی احترام کو قومی سطح پر فروغ ملے گا۔ کاکس میں سینیٹر دنیش کمار، خلیل طاہر سندھو، گوردیپ سنگھ اور پونجو مل بھیل بانی ارکان کے طور پر شامل ہیں۔ اس کی پہلی میٹنگ میں قواعد و ضوابط (ٹی او آرز) کی تیاری اور منظوری دی جائے گی، جس کے ذریعے اس کے اہداف، حکمتِ عملی اور حکومتی و دیگر فریقین سے رابطوں کا لائحہ عمل طے ہوگا۔
ایک خصوصی پیغام میں چیئرمین سینیٹ نے کہا کہ خواتین اور اقلیتوں کی فلاح اور بااختیار بنانا ہمیشہ ان کی پہلی ترجیحات میں شامل رہا ہے۔ انہوں نے بتایا کہ وزارتِ عظمیٰ کے دور میں بھی انہوں نے خواتین اور اقلیتوں کی قومی دھارے میں شراکت اور نمائندگی کو یقینی بنایا۔
انہوں نے شہید محترمہ بینظیر بھٹو کو بھی خراج عقیدت پیش کرتے ہوئے کہا کہ انہوں نے ہر شعبہ زندگی میں خواتین اور اقلیتوں کی ترقی اور شمولیت کے لیے نمایاں کردار ادا کیا۔ چیئرمین پیپلز پارٹی بلاول بھٹو زرداری کی کمٹمنٹ کو بھی سراہتے ہوئے انہوں نے کہا کہ وہ بھی خواتین اور اقلیتوں کو مستحکم اور بااختیار بنانے کے لیے کوشاں ہیں۔ صدر آصف علی زرداری کے بارے میں بھی ان کا کہنا تھا کہ وہ اقلیتی حقوق کے تحفظ اور انہیں ہر شعبے میں مساوی مواقع فراہم کرنے کے عزم پر قائم ہیں۔
گیلانی نے مزید کہا کہ سرکاری ملازمتوں میں خواتین اور اقلیتوں کے کوٹے میں اضافے اور سینیٹ میں اقلیتوں کے لیے چار فی صد نمائندگی کے اقدامات کیے گئے ہیں۔ ان کے مطابق اعلیٰ سطح پر اہم فیصلہ سازی میں اقلیتوں کی شمولیت سے تاریخی ناانصافیوں کا ازالہ کرنے میں مدد ملے گی۔
انہوں نے زور دیا کہ تجویز کردہ پارلیمانی اقلیتی کاکس اقلیتوں کے حقوق کے تحفظ اور فروغ میں مرکزی کردار ادا کرے گا۔ اس مقصد کے لیے سینیٹ کے آنے والے اجلاس میں ایک خصوصی قرارداد بھی پیش کی جائے گی تاکہ اقلیتوں کی پاکستان کی ترقی اور خوشحالی میں خدمات کو باضابطہ طور پر سراہا جا سکے۔
چیئرمین سینیٹ نے اقلیتوں کے پاکستان کی ترقی، خوشحالی اور بین المذاہب ہم آہنگی کے فروغ میں کردار کو تسلیم کیا اور کہا کہ پاکستان ایک کثیر الثقافتی ملک ہے، جہاں مختلف زبانوں، مذاہب اور ثقافت کے شہری قومی استحکام اور ترقی میں حصہ لے رہے ہیں۔
انہوں نے امید ظاہر کی کہ اقلیتی کاکس محروم اور پسماندہ طبقات کی توانا آواز بنے گا، اور ملک کو مزید باہمی روادار، پُرامن اور جامع معاشرہ بنانے میں اہم کردار ادا کرے گا۔
