مہنگائی، بے روزگاری اور علاج معالجے کے بلند اخراجات کے اس دور میں مرکزی مسلم لیگ کے شعبۂ خدمتِ خلق کے زیرِ انتظام چلنے والا قدس فری آئی سینٹر راولپنڈی میں ضرورت مند طبقات کے لیے امید کا منظرنامہ بن گیا ہے۔ ادارے کی جانب سے جاری ششماہی رپورٹ کے مطابق جولائی تا دسمبر کے عرصے میں سینٹر نے مجموعی طور پر ۴۰۲۰ مریضوں کے مفت چیک اپ کیے اور بینائی کے شعبے میں نمایاں خدمات انجام دی ہیں۔رپورٹ میں واضح کیا گیا ہے کہ اسی مدت میں سینٹر میں ۳۶۶ کامیاب آنکھوں کی سرجریز انجام پائیں جبکہ ۱۴۷۰ مریضوں کو مفت ادویات فراہم کی گئیں اور ۸۷۶ مستحق افراد کو چشمے دیے گئے۔ یہ اعداد و شمار غریب و متوسط طبقے کے لیے ایک عملی امداد کو ظاہر کرتے ہیں جو مہنگے نجی اداروں کے مقابلے میں عام آدمی کی پہنچ سے باہر ہوتے جا رہے تھے۔اجلاس سے خطاب میں سیکرٹری جنرل مرکزی مسلم لیگ راولپنڈی انجینئر مبین صدیقی نے بتایا کہ قدس فری آئی سینٹر موجودہ معاشی حالات میں پسے ہوئے طبقات کے لیے روشنی کی کرن ہے اور مرکزی مسلم لیگ کی سیاست اقتدار کے حصول تک محدود نہیں بلکہ خدمتِ انسانیت کے عملی مشن کے گرد گھومتی ہے۔ انہوں نے یقین دلایا کہ فلاحی منصوبے آئندہ بھی اسی جوش و جذبے کے ساتھ جاری رہیں گے۔سینٹر کی خدمات سے مستفید شہریوں میں ماجد حسیب، شبانہ کلثوم، محمد ارشد اور دیگر شامل تھے جنہوں نے کہا کہ قدس فری آئی سینٹر نے ہزاروں مستحق افراد کو بینائی کی نعمت واپس دلائی ہے اور مہنگے نجی اسپتالوں کے اس دور میں ایسے مراکز بے حد ضروری ہیں۔ شہریوں نے مرکزی مسلم لیگ اور شعبۂ خدمتِ خلق کی قیادت اور ٹیم کی محنت کو سراہا۔اجلاس میں شعبۂ خدمتِ خلق راولپنڈی کے چیئرمین عرفان الحق نے ادارے کی مجموعی کارکردگی پر تفصیلی بریفنگ دی اور ڈاکٹرز، پیرا میڈیکل اسٹاف اور رضاکاروں کی شب و روز محنت کو خصوصی طور پر سراہا۔ اس موقع پر یہ عزم دہرایا گیا کہ قدس فری آئی سینٹر کی خدمات کو مزید وسعت دے کر زیادہ سے زیادہ مستحق شہریوں تک معیاری اور مفت علاج کی سہولت پہنچائی جائے گی۔
قدس فری آئی سینٹر نے راولپنڈی میں نئے معیار قائم کر دیا
کوئی تبصرہ نہیں ہے۔
