وفاقی وزیر برائے قومی ورثہ و ثقافت اورنگزیب خان کھچی نے پاکستان نیشنل کونسل آف دی آرٹس میں دو اہم آرٹ نمائشوں کا افتتاح کیا ہے، جن کا مقصد قومی ورثے کو اجاگر کرنا اور جدید فنون لطیفہ کو عام لوگوں تک پہنچانا ہے۔ ان نمائشوں میں معروف فنکاروں کے فن پارے پیش کیے گئے ہیں، جو پاکستانی آرٹ کے مختلف پہلوؤں کی عکاسی کرتے ہیں۔
نمائش "اے ریسٹرینڈ گریس” میں مرحوم استاد بشیرالدین کے فن پارے شامل کیے گئے ہیں۔ ان کے ڈرائنگز میں ان کی اعلیٰ فنی مہارت اور پاکستانی بصری فنون میں نمایاں خدمات کو خصوصی طور پر اُجاگر کیا گیا ہے۔ اس کے علاوہ "بلیڈنگ بارڈرز” کے عنوان سے امین رحمان کی معاصر انسٹالیشنز پیش کی گئی ہیں، جن میں سماجی اور سیاسی موضوعات کو جرات مندانہ بصری انداز میں بیان کیا گیا ہے۔
افتتاحی تقریب سے خطاب کرتے ہوئے وفاقی وزیر اورنگزیب خان کھچی نے پی این سی اے کے کردار اور اس نوعیت کی نمائشوں کے اہتمام کی تعریف کی۔ ان کا کہنا تھا کہ ایسی سرگرمیاں نہ صرف ہمارے ثقافتی ورثے کو فروغ دیتی ہیں بلکہ عالمی فنون کے رجحانات سے بھی معاشرے کو روشناس کراتی ہیں۔ انہوں نے کیوریٹرز اور منتظمین کے کام کو سراہتے ہوئے کہا کہ اس قسم کی کوششیں معاشرے میں ثقافتی شعور بیدار کرنے کے لیے نہایت اہم ہیں۔
وزیر موصوف نے گیلریوں کا بھی دورہ کیا اور وہاں فنکار امین رحمان نے انہیں اپنے فن پاروں کے خیالات اور اہمیت کے بارے میں تفصیل سے آگاہ کیا۔
یہ دونوں نمائشیں عام لوگوں کے لیے کھلی ہیں اور پی این سی اے میں جاری ہیں، جہاں شائقین آرٹ مختلف فن پاروں کو قریب سے دیکھ سکتے ہیں اور پاکستانی فنکاروں کے تخلیقی کام کو سراہ سکتے ہیں۔
