اسلام آباد میں پاسبانِ وطن پاکستان کی زیرِاہتمام یوتھ ڈیولپمنٹ کانفرنس میں مختلف تعلیمی اداروں، یونیورسٹیوں، مدارس اور ٹیکنیکل ایجوکیشن کے نمائندوں، طلبہ، اساتذہ اور سول سوسائٹی کے ارکان نے شرکت کی۔ شرکاء نے موجودہ تعلیمی نظام میں درپیش مسائل اور چیلنجز کا تفصیلی طور پر تذکرہ کیا اور ان کے عملی حل کے لیے تجاویز پیش کیں۔کانفرنس میں شرکاء نے نصاب، تدریسی معیار، اساتذہ کی تربیت اور فنی تعلیم کی دستیابی جیسے موضوعات پر زور دیا۔ موجودہ صورتحال کے تناظر میں تعلیمی اصلاحات کی فوری ضرورت پر اتفاق رائے پایا گیا اور کہا گیا کہ اصلاحات کے بغیر تعلیمی شعبہ ملک کی ترقی کے تقاضے پورے نہیں کر سکتا۔پاسبانِ وطن پاکستان کے رہنماؤں نے طلبہ اور اساتذہ کی رائے سے اتفاق ظاہر کیا اور یقین دلایا کہ وہ ملک کے گزشتہ اٹھتر سالوں سے رائج نظام کے نقائص اور موشگافیوں کو دور کرکے ایک مضبوط تعلیمی بنیاد قائم کرنے کے لیے موقف اختیار کریں گے۔ رہنماؤں نے عوامی مسائل کو عوامی شمولیت سے حل کرنے کے عزم پر زور دیا۔شرکاء نے یہ بھی کہا کہ تعلیمی نظام میں ہنگامی بنیادوں پر اصلاحات لازم ہیں اور تعلیمی شعبے میں ایمرجنسی نافذ کرنے کی ضرورت ہے تاکہ تعلیمی معیار میں فوری بہتری لائی جا سکے۔ خاص طور پر فنی تعلیم کو عام کرنے اور تکنیکی ہنر کو فروغ دینے پر زور دیا گیا تاکہ نوجوان روزگار کے مواقع سے مستفید ہوں۔کانفرنس کے دوران سامنے آنے والی تجاویز میں نصاب کی تجدید، اساتذہ کی مسلسل تربیت، فنی و پیشہ ورانہ تعلیم کے مواقع میں اضافہ اور معاشرتی شراکت کو بڑھانا شامل رہا۔ شرکاء نے کہا کہ عملی اقدامات اور حکومتی و سماجی سطح پر تعاون کے بغیر تعلیمی اصلاحات کا مطلوبہ اثر قائم نہیں ہوگا، لہٰذا اجتماعی کوششوں اور فوری توجہ کی ضرورت ہے۔
اسلام آباد میں یوتھ ڈیولپمنٹ کانفرنس میں تعلیمی اصلاحات
کوئی تبصرہ نہیں ہے۔
